Euro 2020 përmbylli mbrëmjen e djeshme raundin e 1/16 me ndeshje që dhuruan në spektakël dhe surpriza të shumta. Edhe pse disa nga pretendentët tashmë janë nisur për në shtëpi, faza më emocionuese fillon së shpejti.
Të premten fillon rrugëtimi i çerekfinaleve me ndeshjen e parë mes Zvicrës dhe Spanjës. Sfida do të luhet në orën 18:00 në Rusi . Të dyja skuadrat u kualifikuan pas dy ndeshjeve dramatike, respektivisht ndaj Francës dhe ndaj Kroacisë.
Zvicra e Granit Xhakës u kualifikua me penallti ndaj Kampionëve të Botës në një ndeshje që u mbyll në barazim në kohën e rregullt. Zvicerianët i shënuan 5 rastet e tyre të penalltive, ndërsa Mbappe gaboi në pikën e bardhë.
Spanja nga ana tjetër u kualifikua vetëm në kohën shtesë në një ndeshje që prodhoi 8 gola. 90 minutat u mbyllën në barazimin 3-3, me spanjollët që arritën të shënonin edhe dy herë në kohë shtesë.
Çerekfinalja tjetër e së premtes do të jetë mes Belgjikës dhe Italisë në orën 21:00 në Mynih. Italia vjen po ashtu nga një fitore në kohën shtesë ndaj Austrisë, ndërsa Belgjika fitoi minimalisht 1-0 përballë Portugalisë.
Çekia dhe Danimarka hapin sfidat e së shtunës në orën 18:00 në Azerbajxhan. Dy nga surprizat më të bukura të këtij Europiani vijnë pasi eliminuan respektivisht Holandën dhe Uellsin.
Faza çerekfinale përmbyllet me ndeshjen mes Ukrainës dhe Anglisë në Olimpico të Romës në orën 21:00. Ukraina fitoi një ndeshje dramatike përballë Suedisë në kohën shtesë, ndërsa Anglia eliminoi katër herë kampionët e botës, Gjermaninë me rezultatin 2-0 në Wembley.
