Instituti i Studimeve Politike ka publikuar një raport-analizë me titull “Parlamenti në kohën e krizës”.
Në raport përshkruhen me detaje performancën e të zgjedhurve të popullit, për periudhën janar-korrik 2019, raporton “Top Channel”.
Gjatë kësaj periudhe ka pasur deputetë që nuk kanë marrë pjesë në asnjë nga votimet e akteve nënligjore.
Po ashtu edhe kryeministri Edi Rama, nuk mori pjesë në votimet për shumicën absolute të akteve ligjore të iniciuara nga qeveria.
“Funksioni kryesor i Parlamentit janë kontrolli i ekzekutivit dhe ligjvënia. Nëse analizojmë të dyja funksionet gjatë këtij viti rezulton se Parlamenti ka bërë hapa pas. Për shkak të situatës politike, Parlamenti nuk ka arritur realisht të kontrollojë ekzekutivin, sidomos në elemente që kanë të bëjnë me çështje të ndjeshme publike dhe që kanë të bëjnë me pritshmërinë e madhe të qytetarëve ndaj Parlamentit. Së dyti, numri i akteve që ka nxjerrë Parlamenti është shumë i vogël në raport me sesionet e kaluara”, thotë për Afrim Krasniqi, drejtor i Institutit i Studimeve Politike.
Në raport evidentohen 23 deputetë, të cilët përfitojnë bonusin e strehimit, midis të cilëve edhe Nard Ndoka. Më aktivi sipas raportit rezulton kreu i Grupit Parlamentar të PS, Taulant Balla.
Gjithashtu raporti ka dalë në konkluzionin, se deputetët e rinj nuk arrijnë të prodhojnë politikë.
Nuk mund të mungonte edhe lista e deputetëve që nuk kanë folur asnjëherë në Parlament. Lista përbëhet nga Tom Doshi, Lefter Koka, Ylli Shehu, Anduel Xhindi, Andrea Marto, Rrahman Rraja, Ilir Ndraxhi dhe Gjetan Gjetani.
