Detaje të reja janë zbuluar lidhur me kërcënimin ndaj gjyqtarit të Fierit, Vladimir Cjapi, nga Arben Isufaj, i njohur ndryshe si “Ben Qimja”.
Sipas gazetarit Elton Qyno, Cjapi ka një njohje të ngushtë me anëtarët e familjes Isufaj dhe vetë Arben Isufajn, pasi ai ka punuar si avokat në Fier para se të bëhej gjyqtar, dhe ka mbrojtur anëtarë të familjes Isufaj në procese të ndryshme ligjore.
Pasi Cjapi, tani gjyqtar, refuzoi kërkesën e Arben Isufaj për të ndihmuar në një çështje gjyqësore, tensionet mes tyre u ashpërsuan.
Isufaj e kërcënoi gjyqtarin me jetë, duke i thënë: “Mbaje mend se çfarë do të bëjmë…”. Një ditë më parë, në banesën e Ben Qimes në Fier, policia ka kryer një kontroll ku janë sekuestruar armë, targa makine dhe jelekë multifunksional.
Për shkak të kërcënimeve, Këshilli për Mbrojtjen e Magjistratëve vendosi të ofrojë mbrojtje të posaçme për gjyqtarin Cjapi për një periudhë prej 6 muajsh.
Ben Qimja është një emër i njohur në botën e krimit, me një rekord të mëparshëm dënimesh për armëmbajtje pa leje, përfshirje në vrasje dhe trafik droge.
Ai është gjithashtu nën hetim për pasuri të dyshimta, me 13 pasuri të sekuestruara nga Prokuroria e Posaçme në vitin 2021.
Përveç Ben Qimes, edhe anëtarë të tjerë të familjes Isufaj janë përfshirë në procese të ndryshme ligjore për akuzat e përfshirjes në aktivitete kriminale.
