Detaje të reja kanë dalë nga zjarri që përfshiu pasditen e sotme fabrikën e këpucëve “Alba Shoes” në Çorovodë, Skrapar.
Mësohet se ngjarja ka ndodhur rreth orës 17:00 dhe shkak për flakët është bërë një shkëndijë elektrike, që ka sjellë më pas shpërthimin e një prej makinerive brenda fasonerisë.
Në pamjet e siguruara nga JOQ mund të shihet se zjarri ka përfshirë të gjithë fabrikën e këpucëve, ndërkohë që punonjësit kanë mundur të dalin menjëhere pasi kanë parë flakët.
Zjarrfikësja mbërriti menjëherë në vendin e ngjarjes por nuk mundi t’i shuajë flakët direkt. Kjo për faktin se në fabrikë kishte materiale që digjeshin shumë shpejt si lëkurë, letër dhe plastikë.
Nga flakët mësohet se tre banesa që ndodheshin pranë fabrikës kanë pësuar dëme të lehta. Fabrika ndodhej larg zonës së banuar dhe buzë lumit dhe kjo ka shmangur dëme më të mëdha.
Nga flakët e zjarrit është rrezikuar nënstacioni elektrik në Skrapar dhe OSHEE ka stakuar linjën 35kv, Bogovë-Çorovoda për arsye sigurie. Si pasojë, kanë mbetur pa drita zonat; Çorovodë, Çepan, Gjerbes, Leshnje, Potom, Qendër Çorovodë, Vendereshe, Konak dhe Store/ Skrapar.