Pas Arta Markut, përpara KLP doli kandidatja e radhës për postin e Kryeprokurores, Fatjona Mameçaj.
Kjo e fundit bëri një prezantim të karrierës së saj dhe më pas u ndal te platforma e saj, nëse arrin të fitojë garën.
Memçaj tha se në asnjë moment nuk e ka shkelur ligjin.
Ajo u pyet nga një prej anëtarëve të KLP, në lidhje me shkeljen e ligjit në emërimin e saj, shkruan “Shqiptarja.com”.
Memçaj është kundërpërgjigjur, duke thënë se Presidenti dhe Prokuroria nuk e shkelën ligjin në momentin e emërimit të saj.
Anëtarja e KLP: Emërimi juaj ka detyruar Prokurorinë e Përgjithshme dhe Presidentin të shkelin ligjin duke ju emëruar, sepse nuk plotësonit 7 vite për t’u bere prokurore. Çfarë mendoni atëherë për veten tuaj? Ka ndonjë vlere te jashtëzakonshme profili juaj qe këto dy institucione kane arritur t’ju propozoje dhe dekretoje?
Memçaj: Do ju saktësoj një gjë. Folët për shkelje ligji dhe kjo është në konceptin se si e keni vlerësuar dhe se si e keni parë ju. Për mua nuk ka pasur shkelje ligji. Kam konkurruar për vendin ku jam në KLP të asaj kohe. Kam marrë 5 vota nga 6 vota të nevojshme. Mbas këtij votimi, jam propozuar nga Prokurori i Përgjithshëm i kohës, tek presidenti i Republikës, që ka pasur anëtarin e vet në Këshill. Ai ka lëshuar një dekret për emërimin tim në detyrë. Shkak se pse ka ekzistuar ky debat, kanë qenë të tjera. Kam kaluar jo në një individ, kam kaluar në një këshill. Jam e sigurt, se jo për hatrin tim dhe jo për profilin tim, s’do të shkelnin ligjin. Nuk ka pasur shkelje ligjore, por ka pasur interpretim të ligjit.
Më tej Memçaj deklaroi se vettingu po ul numrin e prokurorëve, ndërsa paralajmëroi se rivendosja do të jetë process i gjatë dhe i vështirë.
“Procesi i vettingut po ul numrin e prokurorëve dhe rivendosja duhet të jetë një proces i gjatë e i vështirë, dhe ka krijuar probleme me vendet bosh. Për të kaluar një fazë të tillë duhet të përfshihen të gjithë aktorët, përfshi edhe policinë gjyqësore”, tha Memçaj.
Memçaj u ankua ndër të tjera edhe për mbingarkesën e punës nëpër prokurori.
Ajo shtoi, se Prokurori i Përgjithshëm duhet të shkojë në Parlament, për të folur në lidhje me atë që ka realizuar dhe jo për atë që nuk u realizua.
“Në qoftë se ka komunikim asgjë nuk është e vështirë edhe me intitucionet e reja të reformës. Prokuroria e Përgjithshme ka detyrë të raportoj para KLP e parlamentit mbi aktivitetin që kryen. Marrëdhëniet me KLP nuk janë formale por bashkëpunuese. Nuk di nëse prokurori i Përgjithshëm ka raportuar për gjendjen aktuale të prokurorive. Kemi prokurori me mbingarkesë pune. Nuk më pëlqen formalizimi, për të gjetur zgjidhje ka nevojë për debat. Prokurori i Përgjithshëm duhet të shkojë në parlament të flasë për atë që ka realizuar, jo përse nuk u realizua. Për funksionimin e një prokurorie është i rëndësishëm buxheti. Shpresojmë që ILD të ngrihet deri në fundvit”, tha ndër të tjera kandidatja për Kryeprokurore.
Memçaj theksoi se për të ligji është i shenjtë dhe nëse ajo e shkel, edhe qytetari ka të drejtë ta bëjë.
Ligjin e quaj të shenjtë. Shkeljen e tij nuk ja lejoj vetes ta bej. Aq më shumë aty ku ka të bëjë me të drejtat e interesave të individit. Prokuroria shqiptare deri më tani është sulmuar për këtë qe nuk respekton të drejtat e njeriut. Po akuzohemi se favorizojmë te fortët dhe sulmojmë të dobëtit! Para ligjit janë të gjithë të barabartë dhe nëse e bëj une i them çdo qytetari se po ke të drejtë të shkelni ligjin.
