Mes kritikash e polemikash të shumta, ligji ‘Anti-KÇK’ u miratua më 31 janar nga Këshilli i Ministrave.
Ky ligj parashikon hetimin e 91 krimeve të parashikuara në Kodin Penal, nga vjedhja me armë, tek droga, grupi i strukturuar kriminal, vrasja, falsifikimet, plagosja, rrëmbimi, prostitucioni, terrorizmi, korrupsioni i çdo zyrtari publik e deri tek krimi zgjedhor.(Lexo këtu)
OFL (Operacioni Forca e Ligjit), është Njësia Speciale që del në terren për të zbatuar në bashkëpunim me SPAK-un, Ligjin Special të sapo miratuar për masat pasurore ndaj personave të dënuar ose akuzuar për krim të organizuar.
Tashmë kanë kaluar 4 ditë që kur OFL nis punën dhe ka vënë në lupën e saj 14 persona, ku 7 prej tyre u janë sekuestruar pasuritë vlera e të cilëve përllogaritet në disa milionë euro, ndërsa 7 të tjerëve u është dërguar kërkesa me shkrim për të bërë auto-deklarim të pasurive të tyre dhe burimin.
1.I pari që u godit nga OFL ishte Altin Hajri, pasi më 3 shkurt OFL zbarkoi në Shijak.
Policia kishte kërkuar që të kryhen verifikimet e duhura dhe të justifikohet pasuria e familjarëve të Altin Hajrit dhe nga verifikimet e operacionit Forca e Ligjit rezultojnë 3 shtëpi dhe 1 karburant në pronësi të familjes Hajri. (Lexo këtu)
2.Ditën e djeshme, një ditë pasi mori me shkrim kërkesën për të deklaruar pasurinë e tij, Lulzim Berisha i dorëzoi OFL formularin e vetëdeklarimit. Ndonëse kishte 48 orë afat për ta dorëzuar formularin, ai e ka bërë këtë brenda 24 orëve.
I pyetur për pasuri, tokë apo prona të paluajtshme në emër të tij është përgjigjur se nuk ka asnjë dhe për këtë ka depozituar edhe një vërtetim nga Zyra e Kadastrës Durrës ku rezulton se ai nuk është pronar.
Në deklaratën e pasurisë së tij, Lulzim Berisha sqaron se zotëron një bar kafe me qira, autobote që furnizon me karburant anijet e portit, një makinë dhe aksione në kompaninë që ka në bashkëpronësi me motrën e tij, të gjitha sipas tij, të ligjshme dhe me dokumentacion përkatës.(Lexo këtu)
3.Po ashtu, janë lajmëruar për të vërtetuar pasurinë edhe Ardian Çapja, Dashamir Gjoka, Emiljano Hysenaj dhe i afërmi i tij, Edlir Hysenaj.(Lexo këtu)
4.Ndërsa ditën e sotme, Operacioni Forca e Ligjit lajmëruan dy personave të tjerë, Plaurent Dervishaj dhe Suel Çela, për të justifikuar pasurinë e tyre. (Lexo këtu)
Dervishaj ka fituar pafajësinë në Gjykatën e Lartë mbi burgimin e përjetshëm për vrasje, kurse Çela ka fituar pafajësinë për përplasjen me policinë në shtator 2017, para tregut Agro-ushqimor në Elbasan.
Ata kanë 48 orë kohë për të plotësuar dhe dorëzuar pranë OFL-së deklaratën për pasuritë, e më tej SPAK ka 15 ditë kohë për të shqyrtuar kërkesën, e po kaq ditë ka edhe Gjykata kundër Krimit të Organizuar dhe Korrupsionit për të marrë vendim nëse pasuritë e tyre duhen sekuestruar, apo nëse burimet e tyre të të ardhurave janë të justifikuara.(Lexo këtu se si realizohet kontrolli i pasurisë)
5.Mirëpo, ndryshe nga sa parashikohet, drejtori i Policisë së Shtetit Ardi Veliu, nxorri urdhrin e sekuestros pa vendosur gjykata për disa persona.
Bëhet fjalë për Ardian dhe Artan Doçi, Aldo Manishta, Gentian Finiqit, Martin Bleta dhe një person me inicialet M.D.(Lexo këtu)
Ata dyshohen se janë pjesë e grupit që organizuan pengmarrjen dhe vrasjen e Jan Prengës më 17 janar 2020, pas konflikteve të vëllait të tij në Angli dhe prishjes së pazareve të drogës me bandat e trafikut që veprojnë në Shqipëri. Pasuritë e sekuestruara të këtyre personave janë banesa private, vila superluksoze me pishina, sipërfaqe toke dhe automjete. (Lexo këtu)
Kujtojmë se OFL ka në dorë listën e parë me 150 subjekte, nga 250 në total që pritet të skanohen nga njësia speciale.(Lexo këtu)
