Ligjet miratuan dje paketën me ndryshime Kushtetutese, ku përfshihet heqja e koalicioneve dhe hapja pjesore e listave të kandidatëve për deputetë, ndërsa pragun elektoral iu ra në dorë Kodit Zgjedhor. Mirëpo, ky ndryshim duket se po sjell një krizë të re politike në vendin tonë.
Përveç murit të fortë kundërshtues nga PD dhe Presidenca, kryeministri Rama duket se ka kundër edhe ndërkombëtarët. Së fundmi, ambasadori i Bashkimit Europian, Luigi Soreca i ka dërguar një mesazh të qartë Partisë Socialiste dhe kryeministrit, se ndryshimet Kushtetuese, të propozuara nga opozita e re, dhe të mbështetura nga maxhoranca, nuk mbështeten tek rekomandimet e OSBE/ODIHR.
Nga qyteti bregdetar ku ndodhej për të vizituar dhe parë nga afër një sërë investimesh të Bashkimit Europian, Soreca tha se unioni po pret miratimin pa vonesa të marrëveshjes së miratuar me konsesus nga të gjitha palët në 5 qershor. Po ashtu, ai shtoi se në rast se palët nuk ecin përpara me Reformën Zgjedhore, atëherë nuk ka për të patur një datë fikse për konferencën e parë, ku ekipi shqiptar do të ulet me ndërmjetësuesit e Bashkimit për të diskutuar mbi procesin.
“Kemi parë propozime shtesë që s’janë pjesë e rekomandimeve të OSBE/ODIHR. Palët të vazhdojnë dialogun me të njëjtën frymë bashkëpunuese. BE ka mirëpritur marrëveshjen e 5-qershorit dhe pret të miratohet. Reforma Zgjedhore është pikë kyçe për hapjen e negociatave. Pa këtë kusht nuk mund të fillojë konferenca e parë. Ne e njohim rolin e parlamentit në lidhje me reformën zgjedhore. Marrëveshja parashikon edhe krijimin e një komisioni qëndror.”,-tha Soreca në Kaninë të Vlorës.
Kujtojmë se dje Johann Wadephul, kreu i grupit parlamentar të CDU-CSU-së bëri me dije se minimi i marrëveshjes së 5-qershorit, cënon procesin e negociatave. Por deri më tani, socialistët nuk janë tërhequr nga propozimi i opozitës së re.