Kryeministeri i Shqipërisë, Edi Rama ka mbledhur sot Sekretariatin e ri të Partisë Socialiste. Vetëm pak ditë më parë gjatë Asamblesë Kombëtare, Rama njoftoi ndryshimet brenda partisë.
Sipas informacioneve të marra mësohet se mbledhja e kryeministrit Rama është vetëm me Sekretariatin e ri dhe jo me grupin parlamentar.
Më 2 shtator, kryeministri Rama para se të njoftonte emrat e ministrave të rinj për kabinetin qeveritar të mandatit të tretë, propozoi ndryshimet në sekretariate.
Damian Gjiknurit i besoi postin e Sekretarit të Përgjithshëm në vend të Taulant Ballës. Disa ministrave të kabinetit të dytë gjithashtu i besoi poste si Blendi Klosit Sekretar Organizativ, Anila Denaj Sekretare e Burimeve Njerëzore, Etilda Gjonaj Sekretare e Gruas.
Po ashtu Etien Xhafajt i besoi Sekretariatin Dixhital, Romina Kukos Sekretariatin e marrëdhënieve me jashtë në PS ndërsa Sekretariatin e Punës së PS me Rininë ia besoi studentes 20-vjeçare Bojkena Basha.
Tre ditë më parë PS propozoi Ramën për kryeministër tek Presidenti Meta ndërsa kjo mbledhje tashmë vjen vetëm 3 ditë nga sesioni i ri parlamentar më 10 shtator.
Një e nga një deputetët socialistë kanë mbërritur në selinë rozë që prej orës 08:00 të mëngjesit të sotëm dhe diskutimet pritet që të fokusohen te legjislatura e re dhe programi qeverisës i të majtëve.
Mbledhja e grupit vjen pas mbledhjes së asamblesë, ku PS zgjodhi kryesinë e re dhe sekretarët, ndërkohë që Rama prezantoi qeverinë e re që do të drejtojë vendin në katër vitet e ardhshme.
Pjesë e mbledhjes janë të gjithë sekretarët e rinj të PS-së:
Sekretar i Përgjithshëm, Damian Gjiknuri
Sekretar Organizativ, Blendi Klosi
Sekretar Dixhital, Etjen Xhafaj
Sekretar i Burimeve Njerëzore, Anila Denaj
Sekretare e Gruas, Etilda Gjonaj
Sekretare e Marrëdhënieve me Jashtë, Romina Kuko
Sekretare e Rinisë, Bojkena Basha.
Postet e reja brenda qeverisë dhe partisë sollën dhe disa pakënaqësi në radhët e socialistëve, ku Taulant Balla mbeti jashtë kabinetit pavarësisht se është deputeti më i votuar, ndërkohë që Erion Braçe po ashtu e sheh veten jashtë çdo funksioni.
PS fitoi 74 mandate në zgjedhjet e 25 Prillit, ndërkohë që seanca e parë në Kuvend të premten do të drejtohet nga Luljeta Bozo e cila është dhe e zgjedhura më e vjetër që do të ulet në karriget e parlamentit.
Drejtimi i Kuvendit i është besuar Lindita Nikollës, ndërkohë që qeveria e re e Ramës ka pak ndryshime nga ajo aktuale sa i takon ministrive më të rëndësishme në vend.
