Drejtoresha Teknike e Organozatës Botërore të Shëndetësisë, Maria van Kerkhove, ka bërë me dije se versioni i ri i Covid-19 i cili u shfaq fillimisht në juglindje të Anglisë, është gjetur edhe në Danimarkë, Hollandë dhe Australi.
“Një lloj i ri i koronavirusit u shfaq në Danimarkë, Holandë dhe kishte një rast në Australi, por nuk u përhap më tej atje. Sipas informacionit që Anglia ndan me ne, lloji i ri erdhi ose nga juglindja e Anglisë ose nga Londra”, ka deklaruar për BBC-në përfaqësuesja e OBSH-së, Van Kerkhove.
Drejtoresha Teknike e OBSH tha se organizata Botërore e Shëndetësisë, është e shqetësuar pasi virusi ka shumë mutacione, ndërsa shtoi se lloji i ri i virusit nuk shkakton raste më të rënda, sipas rezultateve paraprake.
“Ne jemi të shqetësuar për përhapjen e virusit dhe faktin se ka shumë mutacione. Ne jemi të vetëdijshëm se lloji i ri nuk shkakton raste më të rënda sipas rezultateve paraprake, megjithatë, studimet janë duke u zhvilluar dhe ne do të shohim rezultatet,” ka shtuar ajo./Gazetareforma.com/
