Një vatër e re e murtajës së ruminantëve të vegjël është konfirmuar në qarkun e Korçës, konkretisht në fshatin Shkozë të Bashkisë Maliq.
Autoritetet veterinare kanë bërë të ditur se analizat laboratorike kanë rezultuar pozitive dhe si pasojë, mbi 180 krerë dele dhe dhi do të asgjësohen.
“Laboratori konfirmoi praninë e sëmundjes në fermën e Shkozës. Vetëm sot do të eliminohen rreth 110 krerë. Në rastin e një ferme të infektuar, i gjithë mbarështimi asgjësohet. Kjo sëmundje nuk parashikon dëmshpërblim nga shteti, pasi është hera e parë që shfaqet në vend. Duhet ndërhyrje për të ndihmuar fermerët, pasi rreziku është i lartë. Vetëm në këtë zonë janë rreth 2 mijë krerë që mund të preken,” deklaroi drejtuesi i veterinarisë, Demirali Latollari.
Fermeri Enkel Shkëmbasi, i cili zotëron fermën e prekur, shprehet i dëshpëruar: “Do groposen mbi 180 krerë. Humbja është e jashtëzakonshme. Jetoj vetëm nga ky aktivitet. Në borxhe jam, në rrugë jam. Nëse nuk më ndihmon shteti, nuk kam çfarë të bëj. Po mendoj të gropos edhe veten përkrah tufës.”
Ndërkohë, autoritetet veterinare po përpiqen të izolojnë vatrën dhe të kufizojnë përhapjen e mëtejshme, edhe pse e pranojnë se dëmi ekonomik është i konsiderueshëm.
Sëmundja ngjitëse, që prek kryesisht delet dhe dhitë, po përhapet me shpejtësi në mbarë vendin. Situata në Gjirokastër është veçanërisht alarmante për shkak të dendësisë së lartë të fermave dhe rrezikut të përhapjes drejt Konispolit.
Pavarësisht masave të marra, si ndalimi i tregtisë së gjësë së gjallë dhe kufizimi i kullotave, infeksioni nuk është ndalur. Deri tani janë eliminuar mbi 1,200 kafshë të infektuara në shkallë vendi.
Ekspertët shpresojnë se temperaturat e larta të verës mund të ndihmojnë në frenimin e virusit, i cili nuk mbijeton gjatë në ekspozim të drejtpërdrejtë ndaj diellit.
Megjithatë, theksohet se bashkëpunimi i fermerëve është thelbësor për të kontrolluar situatën, çdo rast duhet të raportohen menjëherë.
Ministria e Bujqësisë, ndërkohë, nuk ka ofruar asnjë ndihmë financiare për fermerët e dëmtuar, duke u mjaftuar me udhëzime teknike dhe këshilla parandaluese.
Burime nga autoritetet zbulojnë se përhapja e murtajës në Shqipëri ka ardhur pas futjes kontrabandë të bagëtive nga Rumania, me dokumente të falsifikuara.
Dështimi i kontrolleve në pikat doganore dhe në tregjet e kafshëve ka lejuar përhapjen e sëmundjes në disa qarqe, përfshirë Shkodrën, Dibrën, Bulqizën, Tiranën, Korçën, Devollin, Skraparin, Lushnjën dhe Gjirokastrën.
