Mjeku Erion Dasho ka ngirtur akuza të forta ndaj Ministrisë së Shëndetësisë lidhur me manipulimin e vdekjeve nga COVID-19. Në një intervistë në Ora Neës ai ka thënë se shifrat e publikuara nga INSTAT nuk përputhen me shifrat e publikuara nga ministria dhe këtu vihet re një nënraportim.
“Ato 1000 raste që kemi sot, nëse do të testohej më shumë do të ishin disa fish më tepër dhe janë disa fish më tepër. Sa i takon shifrave të vdekjeve, është provuar tashmë se manipulohen. Unë shoh të dhënat e vdekjeve që publikon INSTAT dhe ato që publikon ministria e Shëndetësia dhe ka një mospërputhje. Këtu vihet re një nënraportim dhe nuk mund të them se është e qëllimshme apo jo. Ajo që është e paqëllimshme, është fakti se nuk testohet dhe si rrjedhojë nuk mund të gjurmosh dhe të trajtosh. Kjo mund të jetë e paqëllimshme lidhur me vdekjet, por të gjitha indiciet janë që duhet testim disa fish më shumë.”, ka thënë Dasho.
Mjeku ka thënë se duhet të shtohet numri i testimeve dhe dhe të trajnohej personeli. Sipas Dashos masat nuk janë të bazuara, por janë marrë sipas kapriçove.
“Gjatë gjithë kohës qeverisë i janë dhënë argumente që duhet të testonte, të gjurmonte, të përmirësonte trajnimin, të trajnonte personelin dhe të kishte masa të bazuara jo mbi kapriço.”, tha mjeku
