Manastirliu deklaron dy herë më shumë teste serologjike nga sa janë kryer në realitet.
Ministrja e Shëndetësisë, Ogerta Manastirliu, më 29 qershor, në emisionin “Open” njoftoi se deri në ato momente ishin kryer më shumë se 8 mijë teste serologjike, kryesisht stafit mjekësor.
Por ndryshe nga sa Manastirliu kishte deklaruar, Ministria e Shëndetësisë, këtë të mërkurë njoftoi se ishin kryer vetëm 4010 teste serologjike në total që nga nisja e procesit.
“Kemi filluar testimin e serologjisë për mjekët. Janë bërë më shumë se 8 mijë analiza serologjike”, deklaroi ministrja e Shëndetësisë, Manastirliu më 29 qershor.Manastirliu shtoi se pas kryerjes së më shumë se 8 mijë testeve serologjike të kryera te mjekët, procesi do vijonte edhe në mbarë popullatën.
“Ne presim të kemi një mbledhje të komitetit të ekspertëve, Brenda kësaj jave për të marrë vendimin e tyre, pra ata do e marrin vendimin se kur do jetë testimi në popullate”, shtoi Manastirliu.
Ministria e Shëndetësisë, gjatë përditësimit të situatës si pasojë e pandemisë “Covid-19”, të mërkurën, raportoi edhe të dhënat lidhur me testimet totale, të ndara në testime molekulare dhe serologjike.
TESTIME TOTALE: 30,647
TESTIME MOLEKULARE: 26,637
TESTIME SEROLOGJIKE: 4,010
(Shifrat që jep ministria e Shëndetësisë)
Prej 20 prillit në Shqipëri nisën të kryhen edhe testet serologjike. Personeli shëndetësor, policia dhe “grupet e rrezikuara” si më të ekspozuarit ndaj rrezikut për t’u prekur nga “Covid-19” ishin të parët që iu nënshtruan testit.
Marrë nga Newsbomb