Presidenti i Shqipërisë, Ilir Meta, ka refuzuar të shkojë në Komisionin Hetimor të ngritur për shkarkimin e tij. Sot ishte afati i fundit i vënë për presidentin që të paraqitet në Komision, por sërish nuk ka shkuar. Deputeti Spartak Braho nuk hezitoi të thotë se presidenti duhet të merret edhe me forcë, pasi nuk ka vullnet.
“Presidenti ka detyrimin të sillet edhe me forcë, të gjejë mjetet. Por do të thotë se s’ka vullnet të njohë këtë komision. Ky president nuk ka karakter, kjo është themelorja. Më kujtohen ngjarjet e viteve të shkuara kur ky presidnet në pozitën e kryeministrit në atë kohë e mori me dhunë misterdepulesën. Ashtu siç Berisha e ka marrë me dhunë në ‘94. Ishin këta skenarë të kurdisur midis tyre.
Pse nuk vjen sot ky ne Parlament i thirrur nga komisioni? Akuzohet për thirrje për dhunë. I mungon komisionit hetimor për ta thirrur. Jam dakord me logjikën dhe shpjegimet e zonjës Bushka por ne duhet te shfaqim vullnetin tonë. ai duhet thirrur me dhunë nesër. Ta votojmë këtë propozim. Ky është mendimi im,” deklaroi Braho.
Ndërkohë, Vasilika Hysi tha edhe njëherë se ata janë të gatshëm ta lënë në dorë të kreut të shtetit zgjedhjen e orës dhe ditës për t’u paraqitur. “Ta zgjedhë vetë ditën dhe orën duke e lënë të hapur. Duke i lënë çdo orë të ditës edhe në festa që të vijë dhe të dëshmojë”, u shpreh Hysi.
Kujtojmë se burime të sigurta për Gazeta Reforma bëjnë me dije se Komisioni Hetimor Parlamentar do të shkarkojë presidentin Ilir Meta këtë javë ose brenda javës tjetër, në varësi të kohëzgjatjes së procedurës.
