Presidenti Ilir Meta iu është bashkuar ngushëllimeve për ndarjen nga jeta të ‘Mjeshtrit të Madh’, njeriut të kamerës, Lulzim Balla, babait të gazetarit të njohur Sokol Balla.
Përmes një mesazhi, kreu i shtetit teksa vlerësoi figurën e Ballës, theksoi se ai shërbeu me përkushtim në detyrën e tij në RTSH për gati 4 dekada.
Postimi i plotë
Më trishtoi lajmi për ndarjen nga jeta të “Mjeshtrit të Madh” të kameras dhe imazhit, Lulzim Balla, njërit prej figurave më të dashura të Radio Televizionit Shqiptar, ku shërbeu me dashuri, përkushtim e devotshmëri për gati 4 dekada.
Ngushëllime të ndjera për bashkëshorten Fatbardha, për Sokolin, Dorjanin e Rezarin, për të afërmit e bashkëpunëtorët e Tij, si dhe për kolektivin e RTSH, për këtë humbje të madhe e të pazëvendësueshme!
Në këto momente të vështira jam pranë familjes Balla!
I paharruar kujtimi i Tij!
Lulzim Balla ishte një nga emrat më të njohur të kamerës televizive ndër vite në Shqipëri, ndërroi jetë në moshën 74 vjeçare.
Ai humbi betejën me sëmundjen e rëndë që e kishte munduar aq shumë vitet e fundit.
Balla është një nga emrat ikone të kamerës televizive në vendin tonë para dhe pas viteve të demokracisë.
Lulzim Balla e nisi karrierën e gjatë në televizion në transmetuesin publik RTSH, dekada më parë.
Me fokusin e kamerës së tij ishte pjesë e sa e sa studiove dhe kronikave televizive.
Pas kontributit shumëvjeçar në televizionin publik, Balla u angazhua edhe në televizione të tjera duke dhënë një kontribut për t’u vlerësuar edhe në rritjen e brezave të rinj të operatoreve.
Veç kësaj Luli, do mbahet mend nga miqtë dhe koleget e botës së televizionit si njeri i qetë i dashur dhe shumë bashkëpunues.
Për të gjithë kontributin ndër dekada të dhëna në fushën e medias, Lulzim Balla u nderua pak kohë më parë me titullin “Mjeshter i Madh” nga Presidenti i Republikës.
