Presidenti Meta, i cili është në pritje të dekretimit të ministrave të qeverisë ‘Rama 3’ kërkoi informacion nga SPAK dhe nga Prokuroria e Përgjithshme nëse ndonjëri prej të propozuarve ishte nën hetim prej tyre.
Prokuroria e Posaçme Antikorrupsion i ka kthyer përgjigje Presidentit Ilir Meta, pas kërkesës që ky i fundit bëri, ku kërkoi informacion për ministrat e qeverisë së re. Kërkesa në fjalë bëhej për të evidentuar nëse ndonjë prej këtyre zyrtarëve janë duke u hetuar apo jo nga Prokuroria.
“Asnjë prej emrave të paraqitur nuk është i regjistruar si person nën hetim në regjistrin e njoftimit të veprave penale të Prokurorisë së Posaçme,” -thuhet në përgjigjen e SPAK.
E njëjta përgjigje në adresë të presidentit shkoi edhe një ditë më parë nga Prokuroria e Përgjithshme e cila deklaroi se të zgjedhurit e Ramës për këtë qeveri nuk kanë asnjë çështje të regjistruar në gjykatë.
Ishte presidenti Meta ai që kërkoi informacion për 17 anëtarët e kabinetit të ri qeveritar, ndërsa i duhet të shprehet me dekret për secilin prej ministrave të propozuar nga Rama. Tashmë që ata dalin të pastër, të paktën sipas prokurorive, Meta duket se do të shkojë drejt dekretimit të secilit prej tyre, duke tentuar të shmangë dhe një përplasje të re institucionale.
Kujtojmë se afati i fundit që prokuroria duhej të kthente përgjigje ishte 15 shtatori, ndërkohë që SPAK është përgjigjur një ditë para.
