Në një operacion të dyfishtë antidrogë, autoritetet shqiptare kanë goditur dy raste trafikimi të kanabisit me përqindje të lartë THC, të ardhur nga Shtetet e Bashkuara me destinacion përfundimtar Tiranën.
Gjatë 24 orëve të fundit janë sekuestruar 7.7 kilogramë kanabis të ndarë në tre pako postare, ndërsa një person është arrestuar në Elbasan dhe një tjetër është shpallur në kërkim në Vorë.
Operacioni i koduar “Dërgesa 1” çoi në pranga Rakip Hoxhën, 32 vjeç, i cili kishte marrë dy pako me rreth 4 kg lëndë narkotike në një pikë postare në Elbasan.
Ndërsa në kuadër të operacionit “Dërgesa 2”, është shpallur në kërkim 21-vjeçari me inicialet F.I., i dyshuar për përpjekje për të marrë një pako me 3.7 kg kanabis në Vorë.
Ky zhvillim vjen si pjesë e një fushate më të gjerë për goditjen e rrjeteve kriminale të përfshira në trafikun e drogës.
Vetëm gjatë kësaj jave janë sekuestruar rreth 10 kg kanabis dhe janë identifikuar tetë persona të përfshirë.
Policia vijon hetimet për të shkatërruar tërësisht këtë rrjet dhe për të arrestuar të gjithë të përfshirët.
