Ndonëse sapo kishte dalë nga burgu, Vladimir Gjuta ditën e djeshme u arrestua sërish pasi qarkulloi me një pistoletë pranë selisë së Partisë Socialiste, teksa brenda zhvillohej mbledhja e Kryesisë.(lexo këtu)
Ai u pikas nga Garda e Republikës pranë zonës së “Dollarit”, pasi kishte veshur një kapele, mbante një çantë “Gucci” dhe po ashtu kishte një armë në brez.
Sapo forcat e Gardës iu afruan, Gjutës i ra pistoleta në tokë, duke u rrethuar menjëherë nga 5 gardistë, të cilët i gjetën një plumb në gojë dhe 120 mijë euro.
Pas arrestimit të tij, kryeministri u largua nga mbledhja e Kryesisë me mjet të blinduar.
Së fundmi, është bërë me dije se në dëshminë e tij, Gjuta ka treguar se ishte i armatosur pasi kishte shkuar që t’i merrte një personi paratë që i kishte dhënë borxh duke justifikuar kështu shumën prej 120 mijë eurosh që kishte me vete, ndërsa shton se armën e kishte marrë për vetëmbrojtje nëse “borxhliu” do t’i kundërvihej.
“Kisha shkuar që të këmbeja disa para që më kishin borxh. Armën e kisha me vete për vetëmbrojtje,”– mësohet se është shprehur 40-vjeçari.
Vladimir Gjuta është një emër i njohur për drejtësinë.
Më 22 janar ai u arrestua pasi dhunoi kushëririn e tij me çekiç dhe si pasojë i ka thyer disa dhëmbë dhe i ka dëmtuar njërin sy.(lexo këtu)
Po ashtu, Gjuta është akuzuar se ka vendosur tritol te farmacia e babait të Saimir Tahirit, ish-ministër i Brendshëm dhe një vit pas lirimit nga burgu u arrestua sërish për dhunë ndaj babait.
