Gazetari Andi Bushati ka komentuar fjalimin e kryeministrit Edi Rama gjatë mbledhjes së grupit parlamentar, duke e interpretuar atë si një sinjal për negocim me faktorët ndërkombëtarë dhe jo me drejtësinë në vend. I ftuar në emisionin Të Paekspozuarit me Ylli Rakipin, Bushati tha se mesazhi i Ramës ishte i qartë: të goditen të tjerët, por jo ai vetë.
Sipas Bushatit, thelbi i fjalës së Ramës nuk ishte një shqetësim për hetimet e SPAK, por një përpjekje për të adresuar presionin që ai mendon se vjen nga jashtë kufijve të Shqipërisë.
“Fjalimin e Ramës e pashë si ftesë për negocim. Jo me SPAK-un, sepse ai e di që për një mijë vjet nuk i vjen e keqja nga SPAK. Ai mendon se e ka përtej kufijve rrezikun.
Rama tha, më thirrën shokët socialistë dhe më kërkuan se ti je fajtori që i ke hapur kaq shumë rrugë kësaj drejtësie.
Pastaj tha çfarë po ndodh? Ne kemi patur personazhe publike, që kanë qenë mbështetës të reformës dhe sot më kërkojnë llogari, si intelektualë publikë, që kjo reformë ka dështuar. Por unë tha megjithëse i dëgjoj, jam i bindur se duhet të vijojmë përpara.
Rama i drejtohet ndërkombëtare, u thotë ju në 2016 ngritët një koalicion të madh pro reformës. Ky koalicion brenda PS dhe në publik po shkërmoqet. Unë jam garanti i vetëm që mund ta çoj përpara produktin tuaj, prandaj mua më ruani. Ky është në leximin tim, ftesa për negocim e Ramës. Po më godisni, më hani shokët por jo mua”, tha Bushati.
Në analizën e tij, Bushati theksoi se kryeministri po përpiqet të ruajë pozicionin e tij duke e paraqitur veten si garanci të vijimit të reformës në drejtësi, në një moment kur, sipas tij, mbështetja politike dhe publike për këtë proces po lëkundet.
