Në Kavajë është mbyllur një shkollë 9-vjeçare pasi katër mësues të kësaj shkolle kanë rezultuar pozitiv me Covid-19.
Më parë në këtë shkollë ishin infektuar me koronavirus dhe dy mësues të tjerë, por me gjashtë mësues të infektuar shkolla është mbyllur duke vazhduar me mësimin online nga shtëpia për 40 nxënësit që zhvillojnë mësimin aty.
Ndërkohë ka filluar edhe procesi i dezinfektimit të ambienteve të shkollës dhe deri më tani asnjë nxënës nuk ka shfaqur simptoma të virusit dhe po mbahen nën kontroll nga autoritetet shëndetësore.
Ministria e Shëndetësisë ka njoftuar se ditën e djeshme janë konfirmuar 288 raste të reja me COVID-19, dhe 3 humbje jete. Ndërkohë bashkë me numrin e të infektuarve është ulur dhe numri i testimeve pasi gjatë 24 orëve të fundit janë kryer 1304 testime në gjithë vendin.
