Numri i viktimave nga tërmeti shkatërrues që goditi Mianmarin ka arritur në 3,003, ndërsa 351 persona vazhdojnë të rezultojnë të zhdukur, sipas raportimeve të Reuters.
Ekipet e kërkim-shpëtimit po vazhdojnë përpjekjet për të gjetur të mbijetuarit, por shirat sezonalë po e vështirësojnë ndjeshëm operacionin.
Një punonjës i ndihmës humanitare shprehu shqetësimin për situatën në Mandalay: “Nëse shirat vazhdojnë, ata që ndodhen nën rrënoja nuk do të kenë shanse mbijetese”.
Përkeqësimi i kushteve atmosferike dhe konfliktet e brendshme kanë komplikuar akoma më shumë aksesin e grupeve të ndihmës në zonat e prekura.
Kombet e Bashkuara kanë raportuar se më shumë se 28 milionë njerëz janë prekur nga fatkeqësia dhe kanë vënë në dispozicion 12 milionë dollarë për ndihma emergjente në ushqim, strehim dhe ujë të pijshëm.
Ndërkohë, qeveria ushtarake e Mianmarit, e cila mori pushtetin pas grushtit të shtetit të vitit 2021, ka shpallur një armëpushim të njëanshëm për 20 ditë për të lehtësuar operacionet humanitare.
Sidoqoftë, autoritetet paralajmëruan se do të kundërpërgjigjen nëse rebelët do të rinisin sulmet.
Ky vendim erdhi një ditë pasi një aleancë rebele shpalli gjithashtu armëpushimin për të mbështetur përpjekjet e ndihmës.
