Mbrëmjen e djeshme në kryesinë e demokratëve pati tensione dhe përplasje të shumta. Ndërkohë që ditën e sotme ka reaguar Gazment Bardhi i cili dënon aktet e dhunës dhe shprehet se ajo nuk është zgjidhje për problemet me të cilat po përballen demokratët.
Kujtojmë se gjatë largimit nga mbledhja, deputetët janë sharë dhe ofenduar nga disa militantë që kanë qëndruar jashtë zyrës ku mbahet mbledhja. Madje ne momentet kur deputetet po largoheshin, ka pasur një moment përplasje që për pak degradoi ne dhunë fizike ndaj deputetëve. Gjatë tensioneve mes mbështetësve te Bashës dhe deputetëve që u larguan nga mbledhja, janë sulmuar dhe ofenduar edhe gazetarët.
Në mbledhjen e djeshme, deputetja Jorida Tabaku, në cilësinë e nënkryetares së partisë, refuzoi të drejtën për të drejtuar këtë forcë politike deri në zgjedhjen e kryetarit të ri.
Reagim i Kryetarit të Grupit Parlamentar të PD, Gazment Bardhi:
Dhuna verbale, presioni dhe shantazhi kundër deputetëve të PD që mendojnë ndryshe nuk janë mjete politike. Kjo sjellje prej grupimi paramilitar hedh në erë bashkëjetesën brenda kësaj force politike dhe dërrmon në mënyrë përfundimtare besimin e qytetarëve tek PD.
Duke dënuar me forcë aktet e dhunës kundër deputetëve të PD, anëtarëve të Kryesisë dhe gazetarëve, u kërkoj secilit kolegë të distancohen publikisht prej tyre. Përmes dhunës, presionit dhe shantazhit nuk ndërtohet asgjë afatgjatë, në interes të demokratëve dhe të Shqipërisë.
