Me konfirmimin e 2 rasteve të para me Coronavirus, e gjithë qeveria është vendosur në lëvizje ku janë marrë masa të ndryshme.
Kështu, në mbledhjen e kabinetit qeveritar në mëngjes, kryeministri Rama lajmëroi anulimin e aktivitetit mësimor në çdo institucion arsimor, si edhe pezullimin e të gjitha aktiviteteve publike.
Ministrja e Arsimit: “Mësimi do zhvillohet në klasa virtuale, provimet e maturës nuk shtyhen”
Ndërkohë, edhe ministrja e Shëndetësisë Ogerta Manstirliu doli në një konferencë për shtyp, ku dha detaje rreth masave të marra.
Emergjenca Koronavirs/ Manastirliu: “Pezullohen operacionet e planifikuara”
I pranishëm në këtë konferencë ishte edhe kreu i OBSH në Shqipëri, Raul Gonzales, i cili vlerësoi masat e marra nga qeveria shqiptare pas konfirmimit të rasteve me COVID-19.
“Masat e marra sot nga qeveria shqiptare janë shumë të mira dhe janë marrë në kohë për të frenuar përhapjen e virusit. Kjo gjë nuk u realizua brenda ditës në Itali, duke humbur kohë për marrjen e masave që janë të efektshme për parandalimin e përhapjes së COVID-19”, u shpreh Gonzales.
Ndërkohë, Manastirliu i dorëzoi Gonzales planin e veprimit për masat që janë ndërmarrë dhe do të ndërmerren për të adresuar këtë ngjarje të pazakontë të shëndetit publik.
“Qeveria shqiptare, Ministria e Shëndetësisë dhe Mbrojtjes Sociale me rekomandimet direkte të ekspertëve kanë hartuar një plan masash për t’u ndjekur sipas të gjithë skenarëve të parashikuar, duke filluar që nga identifikimi i rasteve të para, karantimi i pacientëve, identifikimi i personave të kontaktit”, tha Manastirliu.
Instituti i Shëndetit Publik (ISHP) raportoi rreth gjurmimit të kontakteve të personave të konfirmuar me COVID-19, punës që po bëhet në terren për kufizimin e përhapjes së koronavirusit, si edhe u raportua se po monitorohet me rigorozitet respektimi i kushteve higjieno-sanitare.
Ndërsa, mjekja Najada Çomo raportoi se dy personat që po marrin shërbim në Spitalin Infektiv janë në gjendje të stabilizuar shëndetësore dhe pa komplikacione.
Ekspertët bëjnë thirrje që personat që kanë simptoma të ngjashme me ato të Coronavirusit, të telefonojnë numrin 127 dhe të mos shfaqen në qendrat mjekësore.
