Kryeprokurorja Arta Marku dhe kreu i KLP, Gent Ibrahimi kanë qenë të pranishëm në analizën e Prokurorisë së Tiranës dhe asaj të Apelit.
Marku nuk i kurseu kritikat në fjalën e saj, ndërsa theksin e ndali tek hetimet e shpejta dhe të pandikuara që duhet të bëjnë prokurorët.
“Në prokurorinë e Tiranës ngarkesa ka qenë më e madhe dhe si duket kjo ka ulur cilësinë dhe efektivitetin në punë. Nuk jeni përqendruar në çështje sa duhet. Çështje mjaft të rëndësishme janë zvarritur pa justifikim, rrinë në sirtare prej vitesh me një mungesë të theksuar përgjegjësie. Vërehen hetime të pakta dhe jo të suksesshme, kjo është përgjegjësi e secilit prej jush, përgjegjësi individuale. Kërkoj veçanërisht që të hetoni shpejt ato çështje ku ka vëmendje të shtuar nga opinioni publik. Ushtroni detyrën tuaj larg çdo ndikimi politik”,- tha ajo.
Ndërsa Gent Ibrahimi kërkoi bashkëpunim me prokurorët e Tiranës.
“Unë do ju lutesha ta shihni KLP si pjesë të zgjeruar të familjes. Kemi detyra dhe përgjegjësi të përbashkëta, të arrijmë rezultate në luftën kundër krimit. Ndëshkimi duhet të bjerë aty ku duhet të bjerë. E nevojshme është të krijojmë ura komunikimi”,– tha ai.
