Ministrja e Shëndetësisë Ogerta Manastirliu ka reaguar pas vendimit të Agjencisë Europiane të Barnave që e deklaroi vaksinën e AstraZeneca të sigurt për përdorim. Manastirliu shkruan se është mbërritur në një konkluzion të qartë shkencor dhe se AstraZeneca është e sigurt dhe efektive. Ministrja thotë se përfitimet e saj janë më të mëdha se rreziku dhe se nuk shoqërohet me mpiksje të gjakut.
Postimi i Manastirliut:
PO NDODH
EMA (Autoriteti Rregullator i Barnave i Bashkimit Evropian):
“Kemi mbërritur në një konkluzion të qartë shkencor. Astra-Zeneca është një vaksinë e sigurt dhe efektive. Përfitimet janë shumë herë më të mëdha se sa risqet. Vaksina nuk shoqërohet me një rritje të rrezikut të përgjithshëm të ngjarjeve tromboembolike ose mpiksjes së gjakut. Provat në botën reale, sugjerojnë që vaksina ka një efektshmëri edhe më të lartë se sa ajo e treguar gjatë testeve.”
Më herët Agjencia Europiane deklaroi se mund të vijohet me përdorimin e vaksinës së Oxford-it dhe AstraZeneca-s dhe se nuk ka lidhje mes saj dhe mpiksjes së gjakut që janë raportuar në disa vende europiane. Kujtojmë që doza e para të AstraZeneca kanë mbërritur në Shqipëri që prej javës së kaluar dhe me to ka nisur procesi i vakisnimit të mjekëve.
