Franca i ka dalë në krah Greqisë dhe Qipros në përballjen e vazhdueshme me Turqinë për zonat e naftës dhe gazit në Mesdheun Lindor.
Presidenti Emmanuel Macron ka pritur në takim presidentin e Qipros, Nicos Anastasiades, me të cilin ka deklaruar se “kërcënimet ndaj shteteve anëtare (të BE-së) janë të papranueshme dhe nuk do të tolerohen.”
Kreu i Elizesë paralajmëroi edhe ndëshkime ekonomike të BE-së ndaj Turqisë për këtë çështje.
Por ndërkohë, Macron ka nxjerr në pah edhe qëllimet e vërteta të Parist në këtë konflikt me Ankaranë dhe ato që janë nafta në detin Mesdhe dhe çështja e Libisë.
“Do të ishte një gabim serioz që çështjet e sigurisë të lihen në duar të aktorëve të tjerë. Ky nuk është një opsion për Europën dhe është diçka që Franca nuk ka për ta lejuar. Ajo që po luhet është një luftë pushteti, veçanërisht nga Turqia dhe Rusia që po e afirmojnë veten përherë e më shumë, një zhvillim përkundrejt të cilit BE-ja po bën shumë pak”, u shpreh Macron.
Kompanitë franceze të naftës kanë lidhur kontrata me Greqinë për kërkimin e naftës në Mesdhe, ku raportohet të ketë depozita të shumta.