Ish-kryeprokurori, Adriatik Llalla u shpall fajtor disa ditë më parë dhe u dënua me dy vite burg. Ndërsa SPAK e shpalli në kërkim ndërkombëtar pasi ai është larguar jashtë vendit.
Ditën e sotme Gjykata e Posaçme kundër Krimit dhe Korrupsionit (GJKKO) ka rrëzuar kërkesën për pezullimin dhe shtyrjen e ekzekutimit të vendimit për dënimin e ish-kryeprokurorit Adriatik Llalla me dy vite burg.
Theksohet se kërkesa për shtyrjen e ekzekutimit të vendimit ishte bërë nga avokati i ish-kryeprokurorit, për shkak të gjendjes së tij shëndetësore.
Sjellim në vëmendje se Adriatik Llalla u dënua me dy vite burg, por nuk është gjetur ende. Pas disa ditësh kërkime në Shqipëri, SPAK e shpalli Llallën në kërkim ndërkombëtar, pasi dyshohet se ndodhet jashtë vendit. Gjithashtu Kujtojmë se Llalla është shpallur fajtor për deklarim të rremë dhe fshehje të pasurisë.
Gjykata e Posaçme e Shkallës së Parë për Korrupsionin dhe Krimin e Organizuar, përveç dënimit me burg, vendosi që Llallës t’i hiqet për 5 vite e drejta për të ushtruar funksione publike, ndërsa pasuria e tij kaloi në favor të shtetit. Bëhet fjalë për 4 sipërfaqe toke, në total 22 mijë metra katrore dhe 1 apartament në Durrës. Llalla u largua jashtë vendit disa ditë përpara se të shpallej vendimi përfundimtar i Gjykatës.
