Ditën e sotme është mbajtur mbledhja e radhës e Këshillit të Lartë të Prokurorisë përmes platformës on-line në kuadër të masave të marra për shmangien e përhapjes së Covid-19.
Mbledhja është mbajtur në prani të gjithë anëtarëve dhe vëzhgueseve të misioneve ndërkombëtare OPDAT dhe EURALIUS, ku janë marrë edhe vendime për lëvizje të magjistratëve.
Mësohet se KLP ka miratuar përcaktimin e përkohshëm të Rozeta Qirjaqi, aktualisht prokurore në Prokurorinë pranë Gjykatës së Apelit Korçë, si drejtuese të institucionit.
Kurse prokurori në Prokurorinë pranë Gjykatës së Shkallës së Parë Gjirokastër Julian Çafka, është emëruar gjithashtu drejtues i këtij institucioni.
Prokurorja Ollga Visi, prokurore në Prokurorinë pranë Gjykatës së Shkallës së Parë Korçë, është caktuar pranë Gjykatës së Apelit.
Drejtuese e Prokurorisë së Pogradecit ështe vendosur përkohësisht deri më 21.08.2020, Dorina Bejko.
Po ashtu, është miratuar projekt-akti “ Për miratimin e lejes së pa paguar për arsye familjare” për prokuroren Miranda Bushi, e cila ushtron detyrën në Prokurorinë Pranë Gjykatës së Shkallës së Parë Tiranë.
