Të shtënat me armë zjarri tashmë janë kthyer në normalitet për shkak të shpeshtësisë së tyre, por të ndodhura në mes të kryeqytetit kanë impakt tjetër.
Rreth orës 21:50 tek stadiumi “Dinamo” janë dëgjuar të shtëna me armë zjarri dhe nga të dhënat e para që vijnë dyshohet se një person ka mbetur i plagosur në këmbë.
Konkretisht ngjarja ka ndodhur në fillim të rrugës “Gjik Kuqali” dhe personi i plagosur, i cili mësohet të jetë shtetasi E.K, 26 vjeç, është jashtë rrezikut për jetën.
Policia e Shtetit ka ngritur postblloqe në rrugët e kryeqytetit me qëllim identifikimin dhe kapjen e personit/ave si përgjegjës për ngjarjen. I riu është transportuar në Spitalin e Traumës dhe po mbahet nën kontrollin e bluzave të bardha.
Sipas ballkanweb, burime nga Policia kanë thënë se ka pasur shkëmbim zjarri mes 2 mjeteve, konkretisht një ‘Benzi’ dhe një ‘Polo’. Nuk dihet nëse i plagosuri është pjese e konfliktit apo është gjendur aty rastësisht. Ajo që e bënë të vështirë identifikimin e autorëve është qëndrimi i të plagosurit, i cili mësohet se nuk ka pranuar të flasë për ngjarjen kur është pyetur nga efektivët e policisë.
Informacion paraprak:
“Rreth orës 21:50, në zonën e Komunës së Parisit, është plagosur me armë zjarri (në këmbë), në rrethana ende të paqarta shtetasi E.K, 26 vjeç, i cili po merr ndihmë mjekësore në spital dhe ndodhet jashtë rrezikut për jetën. Policia po punon për zbardhjen e rrethanave të ngjarjes, identifikimin dhe kapjen e autorit/ve.”, njofton policia.
