Ministrja e Arsimit Rinisë dhe Sporteve, Evis Kushi ka marrë pjesë ditën e sotme në aktivitetin e “Takimit të Mësuesve në Diasporë”, ku morën pjesë gjithashtu Ministri i Shtetit për Diasporën Z. Pandeli Majko, Ministrja e Arsimit, Shkencës, Teknologjisë dhe Inovacionit të Kosovës Znj. Arbërie Nagavci, mësues të shumtë nga diaspora dhe përfaqësues të institucioneve të arsimit dhe të punëve të jashtme të Shqipërisë dhe Kosovës.
Mësohet se kryefjalë e takimit ka qenë ruajtja e gjuhës shqipe, kulturës, traditave dhe identitetit tonë kombëtar tek diaspora. Ministrja Kushi gjatë fjalës së sajë e ka konsideruar diasporën një aset dhe gjithmonë e gatshme për të kontribuar në fushën e arsimit:
“Diaspora është një aset, gjithmonë të gatshëm për të kontribuar në fushën e arsimit. Ruajtja e gjuhës shqipe, ndërgjegjësimi i prindërve shqiptarë mbi rëndësinë e ruajtjes së gjuhës e zakoneve janë në qendër të vëmendjes sonë, sepse identiteti kombëtar që ruan diaspora është qëllim i madh i yni”, tha ministrja Kushi.
Më tej ajo kashtuar se ne e shohim diasporën si një vlerë të shtuar kombëtare. Gjithashtu ajo ka nënvizuar se mësuesit kanë një rol të rëndësishëm në ruajtjen e gjuhës dhe traditave shqiptare. “Ne e shohim diasporën shqiptare si një vlerë të shtuar kombëtare, fëmijët jashtë trojeve shqiptare si një pasuri të madhe, ndërsa mësuesit kanë një vlerë të çmuar për sa i përket mbajtjes gjallë të gjuhës dhe traditave shqiptare”, ka thënë Kushi.
Në këtë kuadër, u shpreh ajo tha se , “ne do të vijojmë të punojmë dhe bashkëpunojmë me përkushtim maksimal, për të qenë sa më efikas në punën tonë në fushën e arsimimit për brezat e rinj shqiptarë që po rriten përtej kufijve”.
