Kryetarja e Këshillit të Lartë të Prokurorisë, Mirela Bogdani, ka dhënë sot një mesazh të drejtpërdrejtë për qeverinë, në një kohë kur debati mbi drejtësinë dhe hetimet është intensifikuar, sidomos lidhur me çështjet e fundit që po diskutohen publikisht.
Gjatë një tryeze të organizuar nga Qendra për Studimin e Demokracisë dhe Qeverisjes, Bogdani theksoi se kur drejtësia flet, të tjerët duhet të heshtin, duke nënvizuar se tashmë çështjet janë në duart e institucioneve përkatëse.
Ky mesazh vjen në një moment kur sistemi i drejtësisë, përfshirë SPAK-un dhe KLP-në, është përballur me reagime dhe sulme të shumta lidhur me hetimet ndaj zyrtarëve të lartë.
Në këtë takim morën pjesë edhe kreu i SPAK-ut, Altin Dumani, dhe gjyqtari i GJKKO-së, Erjon Bani, të cilët ndanë pikëpamjet e tyre mbi punën e drejtësisë në trajtimin e këtyre çështjeve.
“Kini parasysh nuk është vetëm prokuroria që kërkon masat. Vendosen në nivel gjykata dhe ka të tjera nivele që unë përmenda. Nëse prokuroria ka gabuar apo jo është gjykata është ajo që e konfirmon.
Është një situatë e re në të cilën vendi ynë është vendosur.
Mendoj duhet t’u lëmë kohën dhe të tërhiqemi kur drejtësia flet.
Fakti që ne komnetojmë cdo gjë që vendos prokuroria. Duhet të japim kohën e duhur për të treguar se dinë të bëjnë punën e tyre apo kanë gabuar.”-tha Bogdani.
