Situata nga koronavirusi në Kosovë u përkeqësua papritur dhe deri tani janë 449 të infektuar dhe 12 viktima, teksa dje është bërë me dije se Kosova aktualisht ka vetëm 600 teste, të cilat mjaftojnë vetem për 3-4 ditë varësisht nga numri i analizave që do të bëhen.
Mirëpo, ndonëse mund të tingëllojë e pabesueshme, Serbia i ka ardhur në ndihmë, duke i ofruar 1, 000 teste.
Lajmi është bërë i ditur nga Sekretari i Përgjithshëm i Ministrisë së Shëndetësisë Naim Bardiqi, i cili i ka dërguar një e-mail ministrit të Shëndetësisë në detyrë, Arben Vitia dhe drejtorit të Institutit Kombëtar të Shëndetësisë Publike, Naser Ramadani, ku iu ka kërkuar që të lehtësohet importi i këtyre testeve në pikën kufitare në Jarinjës.
Në e-mail e publikuar nga mediat vendase flitet me detaje për donacionin nga Serbia që do të sillet nga zyrtari Ndërlidhës i Beogradit në Prishtinë, Dejan Paviçeviq.
Në këtë email kërkohet që të caktohet personi përgjegjës nga IKSHPK që të mbetet në kontakt me palën nga Serbia që do të sjellë testet për Covid-19 rreth orës 17:00 në pikën kufitare në Jarinjë.
Tashmë pritet edhe reagimi i qeverisë së Kurtit, i cili nuk ka një marrëdhënie të mirë me shtetin serb, por momente të tilla, si pandemia, fshijnë çdo ndasi.
