Kosovë, miratohet projektligji për dialogun me Serbinë

Google+ Pinterest LinkedIn Tumblr +

Qeveria e Kosovës ka miratuar sot projektligjin për detyrat dhe kompetencat e Delegacionit Shtetëror të Republikës së Kosovës në procesin e dialogut me Republikën e Serbisë.
Ramush Haradinaj, kryeministri i Kosovës tha se ky projektligj do t’i dërgohet Kuvendit për shqyrtim dhe miratim.
Ai tha se me anë të ligjit do të përcaktohet hierarkia institucionale dhe procedura vendimmarrëse në procesin e dialogut me Republikën e Serbisë.

“Po ashtu, ligji rregullon funksionimin e Delegacionit Shtetëror të Republikës së Kosovës për Dialogun me Serbinë duke përcaktuar strukturën organizative, veprimtarinë, kompetencat dhe përgjegjësitë e Delegacionit Shtetëror. Mes tjerash, ligji definon qartë edhe ndërlidhjen që Delegacioni Shtetëror mbanë me institucionet tjera kushtetuese të Republikës së Kosovës”, tha Haradinaj.

Kosova po bën përgatitjet finale të bisedimeve me Serbinë.
Synimet janë që në fund të këtij procesi, Kosova dhe Serbia të nënshkruajnë një marrëveshje e cila do të ishte ligjërisht obligative për të dy shtetet, pavarësisht se ligji dhe ekipi negociator nuk e kanë edhe mbështetjen e dy subjekteve më të mëdha opozitare, Lidhjes Demokratike të Kosovës dhe Lëvizjes Vetëvendosje, shkruan rel.

Shpërndaje
Share.

Komento