Pas përkeqësimit të situatës, kryeministri i Kosovës Avdullah Hoti ka deklaruar se si shkak i pandemisë Covid-19 do të kufizohet lëvizja në Prishtinë, Ferizaj dhe Prizren. Ndërkohë ky vendim për rikthimin e karantinës dhe masave të rrepta për pandeminë vjen sepse ditët e fundit është regjistruar një rritje e ndjeshme e rasteve të reja me koronavirus. Pra ky shqetësim i rikthimit të një vale të dytë të pandemisë, ka bërë që Hoti të rikthejë karantinën në këto tre qytete.
Ai ka thënë se nga mbrëmja e kësaj të diele do të vendoset që në qytetet ku ka numër të lartë të personave të infektuar do të kufizohet lëvizja nga ora 21:00 deri në orën 5 të mëngjesit.
“Në qytetet ku ka numër te madh do të kufizohet plotësisht lëvizja. Nga Sonte në Prishtinë, Prizren, Ferizaj, Vushtrri. Do te kufizojmë plotësisht lëvizjen nga ora 21 deri në orën 5 në mëngjes. Do të përcjellim pastaj lëvizjet e numrave me infektime. Do të reduktojmë numrin e të punësuarve në institucione vetëm në staf të domosdoshëm. Në institucione shëndetësore, do të reduktohen të gjitha shërbimet që janë jo-esecenciale që presin. Sa i përket bizneseve. Mbyllen të gjitha lokalet e gastronomisë nga ora 21 deri në orën 5 të mëngjesit. Lejohet puna vetëm në hapësira të hapura dhe take aëay. Numri i njerëzve që shfrytëzojnë një autobus publik përgjysmohet.”- ka deklaruar Hoti.
Kujtojmë se katër persona të tjerë kanë vdekur në Qendrën Klinikë Universitare të Kosovës, të cilët kanë pasur edhe sëmundje shoqëruese. Është kërkuar të bëhet edhe ekspertiza e trupave të të vdekurve. Në total numri i viktimave ka shkuar në 70. Një person ka vdekur mbrëmë ndërsa tre të tjerë sot në orët e para të mëngjesit. Ndërkohë ISHPK informon se janë konfirmuar 178 raste të reja me koronavirus, duke bërë që në të gjithë territorin e vendit të numërohen 3.356 të infektuar që prej fillimit të epidemisë.
