Ditën e sotme ka shkuar në 609 numri i të prekurve nga COVID-19 në vendin tonë, pasi nga testimet e kryera gjatë 24 orëve të fundit janë shënuar 25 raste të reja.
Rastet e reja janë shënuar 17 në Krujë dhe 8 në Kurbin, teksa për herë të parë në Tiranë që nga nisja e epidemisë nuk ka asnjë të prekur.
Nga ana tjetër, numri i të shëruarve ka shkuar në 345, ku gjatë 24 orëve të fundit janë shëruar edhe 18 pacientë të tjerë
Së fundmi, mjekja Esmeralda Meta, e cila është pjesë e personelit mjekësor të spitalit Infektiv ka folur më shumë rreth gjendjes shëndetësore të të shtruarve.
Ajo tha se aktualisht gjendja e pacientëve që ndodhen në COVID 1 paraqitet në gjendjen mbi mesataren, ndërsa theksoi se këta persona kryesisht vuajnë nga një sëmundje e dytë.
Mes të tjerash, në një lidhje me Skype për “Real Story” mjekja tregoi se qëndron gati 10 orë ne punë çdo ditë, ndërkohë që në shërbimin infektiv aktualisht janë 32 të shtruar, ku 5 pacientë janë në terapi intensive.
“Këto kohë punoj nga ora 9e mëngjesit deri në 10 të darkës. Shkoj në orën 8 në mëngjes në punë. Gjendja është relativisht të relaksuar. Ata që janë të sëmurë problematikë, ka me gjendje të rëndë, me gjendje mesatare. Pavarësisht numrit të vogël të pacientëve të shtruar, ndaj tyre duhet pasur kujdes. Të sëmurët që janë aktualisht, janë me një gjendje shëndetësore, mbi mesatare. Të sëmurët janë nën oksigjeno-terapi, disa prej tyre në regjime ventilimi. Për fat këto ditë nuk kemi fatalitete. Të sëmurë që kemi pasur në regjime, një pjesë e tyre kanë dalë nga ky regjim, ventilimi i drejtuar.”
Më pas, Meta foli edhe rreth problemeve që ndeshen këta pacientë, pasi siç ka ë pohuar mjekët virusi shkakton probleme të shumta në organizmin e të prekurve.
“Lidhur me problematikat shëndetësore, simptomat janë më të lehta ose dhe të rënda. Më e rënda është prekja e aparatit të frymëmarrjes, që shkon në oksigjeno-terapi. Kemi përdorur dhe po përdorim skema që përdorin vendet e tjera. Një vaksinë do ishte zgjidhja. Do theksoja se te ne vijnë rastet që janë mbi gjendjen mesatare. Ne mund të flasim për një trend të uljes së rasteve, por s’mund të themi se janë ulur rastet që kanë problematika serioze.”
