Ndërhyrja e Zvicrës mes dy palëve SHBA-Iran duket se ka qenë vendimtare mbi vijimin e konfrontimeve, të paktën deri më tani.
Gazeta “Wall Street Journal” ka intervistuar disa zyrtarë amerikan, të cilët kanë pohuar se pas vrasjes së Qassim Soleiman, SHBA i ka dërguar një mesazh Teheranit ku i kërkonte të mos e përshkallëzonin më tej situatën.
Ky mesazh u dërgua përmes Ambasadës së Zvicrës, që është një nga pak urat e komunikimit të drejtpërdrejtë mes palëve.
Një faks i koduar, në të cilin ishte mesazhi i amerikanëve, ka mbërritur në një dhomë të izoluar të misionit zvicerian.
Të gjitha lëvizjet janë brë në një rrjet të sigurt të qeverisë zviceriane, që lidh ambasadën e saj në Teheran me Ministrinë e Jashtme në Bern dhe ambasadën e saj në Uashington.
Vetëm zyrtarët më të lartë kanë kartat kryesore të nevojshme për të kryer veprime në këtë ‘rrjet’.
Ishte ambasadori zvicerian, Markus Leitner, ai që i dorëzoi mesazhin e amerikanëve ministrit të Jashtëm të Iranit, Javad Zarif.
Edhe në ditët në vijim dy vendet kanë shkëmbyer mesazhe, shumë më të kontrolluara se retorikat e tyre publike.
Zyrtarët pohojnë se këto shkëmbime mesazh kanë larguar një konfrontim më të madh, të paktën për momentin.
Zviceranët kanë shërbyer si ndërmjetës midis Uashingtonit dhe Teheranit që nga viti 1980, pas kapjes të 52 pengjeve në ambasadën amerikane nga revolucionarët iranianë.
