Komisioni i Ligjeve i mbledhur sot në mesditë ka rrëzuat dekretin e presidentit për Kodin Zgjedhor me 15 vota kundër dhe 2 pro. Nuk është marrë parasysh asnjë vërejtje e Presidenti. Ndërkohë, dekreti pritet të kalohet edhe në seancën plenare të së enjtes.
Kështu, kryeministri Rama nuk ka pritur Komisionin e Venecias, por e kaloi menjëherë për shqyrtim dekretin e Presidentit Meta për kthimin e Kodit Zgjedhor. Madje e ka rrëzuar. Komisioni i Ligjeve e vendosi me urgjencë në rendin e ditës temën “Shqyrtimi i Dekretit të Presidentit të Republikës nr. 11797, datë 22.10.2020 “Për kthimin e ligjit nr. 118/2020 “Për disa shtesa dhe ndryshime në ligjin nr. 10019, datë 29.12.2008, “Kodi Zgjedhor i Republikës së Shqipërisë”, i ndryshuar”.
Nxitimi i Ramës
Ideja për ta futur menjëherë dekretin në rendin e ditës është e kryeministrit Rama, i cili e justifikon këtë akt, me qëllimet e Presidentit për të marrë peng mazhorancën.
“Ky President i angazhuar si një ekstremist kundër Parlamentit dhe Qeverisë Shqiptare, s’merr dot peng askënd dhe asgjë përveç institucionit që fatkeqësisht ka marrë peng! Opinioni i Venezias mirësetëvijë kur të vijë, por koha për këto zgjedhje s’pret asnjë ditë jashtë procedurave”.
Sipas kryeministrit, mendimi i Venecias është gjithnjë i mirëseardhur, por për një ligj të votuar dhe të refuzuar nga Presidenti, procedura është e qartë: “Refuzimi i Presidentit pranohet ose rrëzohet nga parlamenti! PARLAMENTI DO TË RISHPREHET PA HUMBUR ASNJË DITË!” shkruante Rama sot në rrjetet sociale.
Këshilla e Oliver Vahelyi-t
Këshillën për të pritur vendimin e Komisionit të Venecias, kryeministri Edi Rama e ka marrë publikisht nga komisioneri i Zgjerimit, Oliver Vahelyi, por nuk e ka përfillur.
Eurokomisioneri për zgjerimin Oliver Varlehyi ka reaguar pas vendimit të presidentit Meta për ta çuar Kodin Zgjedhor në Venecia.
“Unë besoj se Komisioni i Venecias do të sigurojë këshilla të shpejta për palët e interesuara shqiptare mbi zbatimin e Ndryshimeve Kushtetuese të 30 korrikut. Parlamenti duhet të marrë në konsideratë që të presë këshillat e Venecias, dhe më pas të vendosë për rivotimin. Është koha që të shikoni drejt zgjedhjeve të lira dhe të ndershme në prill 2021”, shkruante në reagimin e tij Oliver Vahelyi.
Ndërsa Presidenti Meta u shpreh se “I kam kërkuar opinion urgjent Komisionit të Venecias, për ndryshimin e njëanshëm të Kodit Zgjedhor nga ana e mazhorancës. Unë kam demonstruar përgjegjësinë e presidentit për mbajtjen e zgjedhjeve të lira dhe të ndershme në vend”, deklaroi Meta.
/GazetaReforma.com/
