Komisioni parlamentar do të vijojë punën për shkarkimin e presidentit Ilir Meta, pasi mbledhja e radhës do të mbahet ditën e hënë në orën 14:00.
Sipas ligjit Komisioni Hetimor do të hetojë vendimin e presidentit Meta për zgjedhjet e 30 qershorit si dhe emërimet në Gjykatën Kushtetuese. Po ashtu mësohet se do të diskutohet dhe raporti përfundimtar i Komisionit të Venecias.
Kjo mbledhje vjen pas deklaratës që kreu i Partisë Demokratike Lulzim Basha bëri ditën e sotme se prej disa muajsh, Edi Rama i ka propozuar postin e kryeministrit, ndërsa vetë ai do të bëhej president.
Por puna e komisionit duket se s’ka lidhje me ofertën e supozuar të Ramës për Bashën. Konflikti mes Metës e maxhorancës ka nisur kohë më parë, që me caktimin e datës së zgjedhjeve.
Pak ditë më parë Komisioni i Venecias publikoi raportin përundimtar për emërimet në Gjykatën Kushtetuese. Sipas Venecias, Presidenti nuk ka shkelur Kushtetutën në procedurën e tij dhe me faj bëhet KED, pasi sipas Komisionit ka vepruar në fshehtësi dhe nuk ka qenë transparente. Po ashtu Venecia kërkoi dhe bashkëpunim mes palëve për vijimin e punës për emërimin e anëtarëve të Gjykatës Kushtetuese. Pas deklaratës së Komisionit, Meta dhe Ruçi zhvilluan një takim dhe u zotuan se do të vijonin punën së bashku.