KLSH pasi auditoi sistemin elektronik i tatimeve e-Taxation ka ngritur alarmin për gjendjen e tij. Kontrolli i lartë i Shtetit deklaron se gjendja e tij është kritike dhe duke marrë në konsideratë ndërlidhjen që ka me sistemet e tjera, rrezikohen që ato të cënohen.
Sipas audituesve, të dhënat e sistemit e-Taxation i nevojiten dhe sistemit të Fiskalizimit, ku të dhënat e tatimpaguesve kalojnë në sistemin e Fiskalizimit në fund të çdo dite, që do të thotë se në mungesë të të dhënave nga e-Tax, funksionimi i rregullt i fiskalizimit është i cenuar në lidhje me: subjektet e reja, ndryshimet e të dhënave për statusin e aktivitetit, niveli i taksimit, ndryshimet te punonjësit, si dhe kalimi automatik i librave të shitjes dhe të blerjes, shkruan Monitor.
Ndër të tjera në raportin e KLSH thuhet: “Nga auditimi u konstatua se pajisjet fizike të sistemit e-Taxation janë në një situatë tejet kritike, një sistem ky shumë i rëndësishëm për DPT, nisur nga veprimet operacionale që kryhen aty si nga ana e biznesit, administratës tatimore, ashtu dhe nga institucionet e tjera me të cilat janë ndërtuar ndërveprime me të dhëna të këtij sistemi”.
Kjo evidentohet bazuar në të dhënat mbi hapësirën e lirë në servera dhe në storage (ruajtje) e cila paraqitet rreth masës 90%, pra pothuajse në ezaurim.
“Megjithëse gjatë auditimit në terren u hap procedura për mirëmbajtjen e sistemit e-Taxation, ne vlerësojmë se ndërprerja nuk do të mund të sigurohet, për arsye se sistemet informatike nuk mund të jenë funksionalë nëse pajisjet janë në ezaurim të hapësirës së tyre dhe funksionojnë në limitet e ciklit jetësor dhe me sisteme operimi jashtë suportit teknik, që do të thotë i pasigurt”, theksohet gjatë raportit.
Ekspertët që kanë realizuar auditimin thonë se probabilteti për ndërprerjen dhe pamundësia për ta vënë në funksion, në një kohë të shkurtër sistemin e-Taxation, është shumë e lartë. Në këtë situatë, përballë këtij raporti shqetësues, KLSH thekson se AKSHI dhe tatimet duhet të marrin masa konkrete.
“Hapësira fizike e zënë për serverët dhe pajisjet storage me përfundimin e auditimit në terren ishte në masën 90%, pothuajse në ezaurim. Hapat e ndërmarrë ndërmjet DPT-s dhe AKSHI-t për rinovimin e pajisjeve fizike ku qëndron sistemi e-Taxation janë në nivel diskutimi dhe ende nuk është arritur në një vendimmarrje. DPT ka planifikuar një fond për të cilin AKSHI shprehet se nuk është i mjaftueshëm, por në kushtet kur DPT nuk i disponon më asetet rrjedhimisht planifikimi i fondeve për rinovim duhet të plotësohet nga administratori dhe poseduesi i këtyre aseteve që është AKSHI” vlerëson raporti i auditimit nga KLSH.
