Këshilli i Lartë i Gjyqësorit vendosi ditën e sotme për kthimin e Ardian Dvoranit ish-kreu i Këshillit të Emërimeve në Drejtësi, dhe në të njëjtën kohë ish-anëtar i Gjykatës së Lartë, si gjyqtari i Gjykatave të Apelit.
Gjatë mbledhjes së sotme u diskutua për Dvoranin dhe iu la atij në dorë zgjedhë mes 6 pozicioneve të punës në Gjykatat e Apelit në vend, për të ushtruar funksionin e gjyqtarit.
Gjykata e Apelit Tiranë,
Gjykata, e Apelit Administrativ
Gjykata e Apelit, Korcë
Gjykata e Apelit Gjirokastër
Gjykata e Apelit Durrës
Gjykata e Apelit Shkodër.
Dvorani i është lënë kohë deri më 28 korrik që të vendosë se në cilën gjykata do të dojë të ushtrojë detyrën e tij.
Gjithashtu Këshilli vendosi hapjen e procedurës së komandimit në pozicionin e ndihmësmagjistratit në Gjykatën e Lartë dhe shpalljen e kërkesës për 5 (pesë) kandidatura nga radhët e gjyqtarëve.
Ndërkohë kujtojmë që edhe më parë Dvorani ka patur si qëllim gjykatën e Apelit pasi gjithë vonesat për largimin nga pozicioni që mbante ishin për këtë qëllim.
Këshilli i Lartë Gjyqësor vendosi mbarimin e ushtrimit të detyrës së Ardian Dvoranit si gjyqtar në Gjykatën e Lartë, pas një kalvari të gjatë përplasjesh mes tij dhe presidentit Ilir Meta.
Anëtarët votuan me 6 vota pro për përfundimin e ushtrimit të detyrës së Ardian Dvoranit, ndërsa 4 prej tyre kanë qenë kundër, teksa anëtari Dritan Hallunaj mungonte.
Njoftimi i plotë:
Sot me datë 23.07.2020, Këshilli i Lartë Gjyqësor zhvilloi mbledhjen plenare të radhës në të cilën shqyrtoi disa çështje të rëndësishme. Më konkretisht:
Këshilli vendosi hapjen e procedurës së komandimit në pozicionin e ndihmësmagjistratit në Gjykatën e Lartë dhe shpalljen e kërkesës për 5 (pesë) kandidatura nga radhët e gjyqtarëve.
Në vijim Këshilli, pasi u njoh me dokumentacionin përkatës, vendosi pezullimin e shqyrtimit të kërkesës së paraqitur nga znj. Ariana Gaçi, për rikthimin e saj në funksionin e Këshilltarit të Gjykatës së Lartë. Kjo vendimmarrje u bë për shkak të kërkesës saj të paraqitur për shqyrtim para Gjykatës së Rrethit Gjyqësor Tiranë.
Më tej, mbledhja vijoi me shqyrtimin e relacionit mbi situatën e pritshme të caktimin në pozicion të të sapodiplomuarve për magjistratë. Pas diskutimeve, Këshilli vendosi që t’i kërkojë Shkollës së Magjistraturës, si organi kompetent që bën renditjen e kandidatëve për magjistratë, të unifikojë listën e të diplomuarve për magjistratë, profili gjyqtar.
Pas diskutimeve, Këshilli vendosi publikimin e pozicioneve të lira në nivel apeli, për gjyqtarin Ardian Dvorani, që ka të drejtën e caktimit në një pozicion të tillë. Pas kësaj vendimmarrje gjyqtari Ardian Dvorani, ftohet për të zgjedhur deri më datë 28.07.2020, njërin nga pozicionet e lira në gjykatat e mëposhtme:
Gjykata e Apelit Tiranë, Gjykata e Apelit Administrativ, Gjykata e Apelit Durrës, Gjykata e Apelit Korçë, Gjykata e Apelit Gjirokastër, Gjykata e Apelit Shkodër.
Gjithashtu, Këshilli vendosi përfundimin e procedurës së ngritjes në detyrë në Gjykatën e Lartë, për pozicionin e lirë në fushën e të drejtës civile, të shpallur me Vendimin nr.86, datë 26.02.2020, të Këshillit të Lartë Gjyqësor, për kandidaten znj. Klodiana Veizi, për shkak të tërheqjes së saj nga kandidimi për këtë pozicion.
Në përfundim të mbledhjes, Këshilli vendosi verifikimin e plotësimit nga kandidatja znj. Irida Kacerja të katër kritereve të kandidimit për ngritjen në detyrë në Gjykatën e Posaçme të Apelit për Korrupsionin dhe Krimin e Organizuar, për pozicionin e lirë të shpallur me vendimin nr. 91, datë 26.02.2020, të Këshillit të Lartë Gjyqësor dhe vijimin e procedurës së verifikimit për kriteret e tjera ligjore të kandidimit.
