Pas mbarimit të mbledhjes së Këshillit Politik, që zgjati më shumë se dy orë dhe pas dakordësisë së palëve për t’u ulur në tryezë për ndryshimet kushtetuese përfaqësuesit e Opozitës Jashtëparlamentare në Këshillin Politik, Oerd Bylykbashi, Petrit Vasili, përfaqësuesja e opozitës parlamentare Rudina Hajdari dhe përfaqësuesi i mazhorancës Damian Gjiknuri dolën në deklaratë për shtyp në lidhje me atë që u diskutua.
Oerd Bylykbashi dhe Petrit Vasili u shprehën se kërkesa e opozitës është e qartë, lista të hapura në nivelin 100% dhe te mos preken koalicionet parazgjedhore dhe shpërndarja e mandateve, ashtu siç edhe krerët e partive përkatëse thanë, Lulzim Basha dhe Monika Kryemadhi.
Bylykbashi tha se mazhoranca duhet të reflektojë dhe të pranojë hapjen e 100% të listave, për sa kohë është çështje që duhet trajtuar në Këshillin Politik.
Ndërkohë që Vasili tha se çëshjta e listave të hapura nga ana e mazhorancës ishte një farsë për heqjen e koalicioneve parazgjedhore.
Po duket se një kërkesë e tillë nuk u pëlqye shumë nga ana e mazhorancës.
Gjiknuri tha se në lidhje me hapjen e listave dhe koalicionet, ato mund të rregullohen në kodin zgjedhor pas votimit të ndryshimeve kushtetuese në parlament.”Hapja e listave ka sfida të mëdha administrative. Ndaj duhet kujdes në mënyrën se si formohen koalicionet.Rëndësi e madhe është hapja e listave.”
Ndërkohë nismëtarja e listave të hapura Hajdari tha se i qëndron vendimit për hapjen e listave në nivelin 100% dhe se tani hapja e tyre është realitet për shqiptarët.
