Sekretari i Përgjithshëm i Partisë Demokratike, Gazment Bardhi ka folur menjëherë pas përfundimit të mbledhjes së Këshillit Politik. Bardhi u shpreh se i kanë kërkuar kryeministrit Rama që të caktojë datën se kur do të miratohet marrëveshja e 5 qershorit pa u ndryshuar.
Më tej Bardhi ka thënë se në tryezë u rikthyen çështje që në të vërtetë partitë politike i kanë miratuar më 5 qershor dhe sipas tij, marrëveshja nuk duhet të ridiskutohet.
Bardhi ka thënë se me miratimin e marrëveshjes plotësohet edhe një kusht i vendosur nga BE për nisjen e negociatave.
Pjesë nga deklarata e Bardhit:
Këshilli Politik ka qenë në një punë të vijueshme për të dakortësuar çështje që lidhen me zgjedhjet, në 5 qershor palët janë dakortësuar. Ne sot në pikë të parë i kërkuam kryetarit të PS se kur do të ndodhë miratimi i marrëveshjes së 5 qershorit. Nuk kemi marrë përgjigje se kur votohet pa ndryshime.
Së dyti dua të konfirmoj që opozita e bashkuar i qëndron marrëveshjes së 5 qershorit. Ju e dini që nga ajo marrëveshje të të gjitha palët morën atë që duan, por ishte një marrëveshje me konsensus. Nuk mund të hedhim poshtë një punë 6 mujore të Këshillit Politik, nuk mundemi që pas 6 muajsh të themi që kemi ndryshuar mendje. Imagjinoni, një orë diskutimi i parë u kthyem prap te administrimi i zgjedhjeve, u rikthyem te depolitizmi.
Çështja e respektimit të marrëveshjes së 5 qershorit është kusht për hapjen e negociatave me BE. Ne i qëndrojmë këtij angazhimi, do duhet që edhe palët e tjera t’i qëndrojnë këtij angazhimi.
Ne nuk kemi kërkuar kohë, ne i kemi dhënë kohë kryetarit të PS të na informojë se kur do të kalojë pa u ndryshuar marrëveshja që kemi bërë në 5 qershor. Besoj edhe ju e dini që nuk ka ende një datë. Për këtë i kemi dhënë kohë kryeministrit dhe presim një përgjigje prej tyre, se kur do të miratohet pa ndryshime. Qëllimi është që të rihapim edhe njëherë çështje që i kemi dakortësuar në marrëveshjen e 5 qershorit, kjo nuk është serioze.
