Këshilli i Mandateve dhe Imunitetit mblidhet sot në orën 12:00 për të shqyrtuar kërkesën e SPAK për arrestimin e zv.kryeministres Belinda Balluku, në një moment kritik kur Gjykata Kushtetuese ende nuk ka marrë një vendim për çështjen e saj.
Mbledhja vjen mes tensioneve të forta politike, pasi mazhoranca socialiste ka refuzuar deri tani të shqyrtojë kërkesën për heqjen e imunitetit të Ballukut, duke u justifikuar me pritjen e vendimit të Kushtetueses. Gjykata e mori në shqyrtim ankimin e qeverisë në një seancë publike më 22 janar, por ende nuk ka një vendimmarrje, duke kërkuar më shumë kohë për vlerësim.
Në këtë klimë, mbetet për t’u parë nëse Këshilli i Mandateve, i drejtuar nga Niko Peleshi, do të veprojë mbi kërkesën e Prokurorisë së Posaçme apo do të ndjekë të njëjtën linjë shtyrjeje, duke i dhënë më shumë kohë një procesi që SPAK e konsideron urgjent.
GJKKO, me kërkesë të SPAK, e pezulloi nga detyra zv.kryeministren Balluku, e pandehur për abuzime me tenderin e Tunelit të Llogarasë. Kryeministri Edi Rama reagoi ashpër, duke e cilësuar vendimin si shkelje të kompetencave të tij ekzekutive.
Rama e çoi çështjen në Gjykatën Kushtetuese, duke argumentuar se GJKKO ka ndërhyrë në kompetencat e kryeministrit për pezullimin ose shkarkimin e anëtarëve të qeverisë. Pas këtij ankimi, Balluku u rikthye përkohësisht në detyrë, deri në shqyrtimin në themel të çështjes nga Gjykata Kushtetuese.
E pandehur për shkeljet në tenderin 190 milionë euro të Tunelit të Llogarasë dhe nën hetim për shtatë procedura të tjera prokurimi lidhur me ndërtimin e loteve të Unazës së Madhe, SPAK ka ngritur dyshime se Balluku, duke qenë në detyrë, rrezikon të prishë provat hetimore dhe të intimidojë dëshmitarët.
