Rreth 40 magjistratë dhe jo magjistratë kanë aplikuar për pozicionet vakante në Gjykatën Kushtetuese dhe në Inspektoriatin e Lartë të Drejtësisë.
Ka qënë Këshilli i Emërimeve në Drejtësi, institucioni që ngriti si problem për shtimin e personelit pranë Gjykatës së Lartë.
“KED shqyrtoi dhe vlerësoi ngarkesën e pazakontë të punës dhe të angazhimeve që kërkohet për verifikimin dhe vlerësimin e kandidaturave për plotësimin e vendeve vakante në Gjykatën Kushtetuese dhe për Inspektorin e Lartë të Drejtësisë.
Deri më tani, për të gjitha pozicionet vakante janë kandiduar 40 magjistratë dhe jo magjistratë, të cilët, njëkohësisht, sipas rastit, duhen verifikuar dhe/ ose vlerësuar nga KED”, njoftoi Këshilli.
Gjithashtu, në lidhje me zhvillimin e shpejtë të kësaj procedure, KED-i njoftoi se ka parë të arsyeshme t’i drejtohet Këshillit të Lartë të Prokurorisë dhe Këshillit të Lartë Gjyqësor me një kërkesë që anëtarëve të KED-it t’u lehtësohet ose hiqet ngarkesa e punës gjyqësore dhe prokuroriale.
“Po kështu, KED vlerësoi t’i drejtohet KLGJ-së dhe KLP-së duke i kërkuar që, bazuar në kompetencat që i cakton ligji, të mundësojë edhe lehtësimin apo heqjen e ngarkesës së punës gjyqësore dhe prokuroriale të anëtarëve të KED-it, në mënyrë që ata t’i kushtohen maksimalisht ngarkesës së punës për realizimin e procedurave komplekse të verifikimin dhe vlerësimit të kandidaturave për gjyqtar në Gjykatën Kushtetuese dhe për Inspektor të Lartë të Drejtësisë”, njoftoi zyrtarisht Këshilli.