Kryeministri i vendit Edi Rama, e ka nisur ditën e sotme me një përshëndetje me pamje nga bregdeti i Velipojës, ku vetëm pak pas mesnate ndodhi edhe një ngjarje e rëndë kriminale me katër të vrarë dhe dy të plagosur. Pavarësisht ngjarjes së rëndë që ndodhi kryeministri ka zgjedhur të tërheq vëmendjen me bregdetin e Velipojës, pa e përmendur masakrën që ndodhi.
“MIRËMËNGJES 😊 nga Velipoja e dashur😍”, shkruan Rama përbri fotos.
Pas postimit të videos i menjëhershëm ka qenë edhe reagimi i komentuesve, që i kujtojnë kreut të qeverisë ngjarjen e ndodhur në mesnatë në Velipojë, ku katër persona mbetën të vdekur dhe dy të plagosur.
“Vendose njëher të vetme gishtin në kokë, o kokë…Lëri fasadat po shiko sigurinë e qytetarëve”, shkruan një komentues.
“Përse nuk merr shteti një aksion për konfiskimin e të gjitha armëve pa leje“, pyet një tjetër komentues.
“Seriozisht e ka ky?”, shkruan një tjetër komentues.
Pak minuta më pas kryeministri ka fshirë postimin për Velipojën dhe ka publikuar një video nga investimi në Shërbimin e Ri të Kardiokirurgjisë në spitalin Universitar “Shefqet Ndroqi”, me të cilën ka uruar një të dielë të mbarë.
Kujtojmë se një ngjarje e rëndë kriminale ka ndodhur pak pas mesnate në Velipojë, ku 4 persona u vranë dhe dy të tjerë u plagosën, një prej tyre vetëm 17 vjeç. Mësohet se sherri ka nisur për vendosjen e shezlongëve dhe përfundoi në një tragjedi me 4 të vdekur. Burime bëjnë me dije se janë përplasur me armë dy familje, Ferracaku e Gocaj, hotelet e të cilëve ishin vendosur 50 metra pranë njëri-tjetrit.
Të vdekur kanë mbetur biznesmeni Kujtim Ferracaku, babai i Arjan Ferracakut të ekzekutuar në Shkodër tre vite më parë. Po ashtu kanë humbur jetën dy pjesëtarë të familjes Gocaj, Xhovano dhe Edmond Gocaj, si dhe punonjësi i shezlongëve Myzerim Zeneli. Ndërkaq të plagosur kanë mbetur dy shtetas të tjerë, Hasan Ferracaku, vëllai i të ndjerit, si dhe Elmedin Dyli.
