Gjykata Penale e Tiranës ka konfirmuar masën e sigurisë “Arrest me burg” për Albano Kusin.
Ky i fundit akuzohet si bashkëpunëtor në vrasjen e punëtorit të kondicionerit, Indrit Çelaj.
Kjo masë sigurie është caktuar edhe më parë në mungesë nga gjykata, për veprën penale “Veprime që pengojnë zbulimin e së vërtetës”.
Avokati, Ilir Murati është shprehur se ndaj klientit të tij nuk ka pasur hetim nga Policia Gjyqësore.
Sipas Muratit, Albano u arrestua vetëm se është vëllai i Griseldos.
Ai ka kërkuar më tej që ndaj klientit të tij, të hiqet masa e sigurisë “Arrest me burg”.
“Asnjë hetim nuk është kryer nga Policia Gjyqësore. Po arrestohet një familje, vetëm se është vëllai i Griseldos, Albano pse duhet të arrestohet. Ka prova që ai nuk ka qenë te ‘Muhamet Gjollesha’ në vilën ku është kryer vrasja. Albano ka shkuar më pas vetëm ka parë objektin, dhe këto element nuk përbëjnë vepër penale. Nuk ka asnjë element për të provuar se ka fshehur të vërtetën. Nuk mund të mbahet në burg, dhe ju duhet ta shihni ligjin qartë dhe të lironi nga masa ‘arrest me burg’. Vetëm në Shqipëri dënohen njerëzit kolektivisht”, shprehet Avokati.
Ndërsa vetë Albano Kusi mësohet të ketë thënë se në momentin e krimit, ka qenë me të dashurën e zona e Brrylit.
Griseldo Kusi ndërkohë, bazuar në pamjet e kamerave të sigurisë, akuzohet se ka qëlluar teknikun e kondicionerit.
Ai u dorëzua një muaj më parë në polici i shoqëruar nga avokati i tij.
Ndaj tij Gjykata e Krimeve të Rënda caktoi masën e sigurisë “Arrest me burg”.
