“Ka qenë në shtëpinë time në përkujtimoren e Azemit”, Fatmira Hajdari heq dorë nga dosja e Bashës

Gjyqtarja Fatmira Hajdari ka dhënë dorëheqjen nga dosja e kreut të PD, Lulzim Basha dhe dy zyrtarëve të tjerë demokrat.

Sot do të zhvillohej seanca e radhës në Apel, por është shtyrë për shkak të vendimit të Hajdarit.

Sipas “Report Tv”, gjyqtarja është dorëhequr për konflikt interesi, pasi Basha ka qenë në shtëpinë e saj në përvjetorin e Azem Hajdarit.

“Nuk kam lidhje familjare por për të mos pasur paragjykime largohem nga cështja, pasi Lulzim Basha ka qenë në shtëpinë time për përkujtimin e bashkëshortit (Azem Hajdarit)” mësohet se ka thënë Fatmira Hajdari.

Kujtojmë këtu se më 13 janar, Gjykata e Tiranës vendosi pushimin e çështjes së lobimit për Bashën, Ilir Dervishin dhe Arben Ristanin.

Gjyqtari Lazër Sallaku i cilësoi të pavlefshme hetimet e Prokurorisë së Tiranës, duke rrëzuar akuzën për falsifikim, pasi sipas tij nuk kishte prova për këtë vepër penale.

Prokuroria nuk ra dakord me vendimin e Sallakut dhe vendosi ta apelonte.