Më 22 maj të këtij viti, ish-zv.ministrja e Arsimit Lorena Haxhiu dha dorëheqjen, pasi i ati, Eduart Haxhiu, u arrestua si pjesë e një grupi të strukturuar kriminal që dërgonte emigrantë në SHBA, Kanada dhe Britaninë e Madhe.
Ndërkohë postin e saj e ka marrë zv. ministrja e re e Arsimit, Sportit dhe Rinisë, Aspasjana Kongo, e emëruar sot nga kryeminisri Edi Rama.
Haxhiu i paraqiti dorëheqjen kryeministrit Rama menjëherë sapo i ati u arrestua. Ndërkohë, Departamenti Amerikan i Shtetit e futi në listën e zezë të personave që u ndalohet hyrja në SHBA, ish-zv.ministren dhe gjithë familjen e saj.
Kujtojmë se 52-vjeçari, Eduart Haxhiu, ka qenë një nga të arrestuarit, dhe pjesë e grupit që kalonte klandestinë me viza false drejt SHBA-ve, Kanadasë dhe Anglisë dhe aktualisht është nën masën e sigurisë “Arrest me burg”, për veprat penale “Ndihma për kalim të paligjshëm të kufijve”, “Falsifikimi i letërnjoftimeve , pasaportave dhe vizave” , “Grupi i strukturuar kriminal”, “Kryerja nga vepra penale nga organizata kriminale dhe grupi i strukturuar kriminal”.
