Klubi i Tiranës ka pasur probleme serioze, por asnjëherë nuk pritej një deklaratë e tillë nga ish-drejtori i saj, Gerti Dajçi, i cili ka thënë se ka plotë 9 rroga pa marrë.
Gjithë problemi është bërë publik, pas një postimi në rrjetin social të Përparim Kabos, i cili kishte kërkuar Vetting në futboll dhe prej këtij postimi ish-drejtori tregon një tjetër anë të errët dhe që mundohet të mbahet e fshehtë të Klubit të Tiranës.
Ky është komenti i plotë që ka bërë Dajçi dhe ku ka akuzuar gjithashtu presidentin e skuadrës, kjo për mospagesat e lojtarëve në kohë, transparencë në financat e tyre apo edhe pagat e prapambetura të punonjësve të administrates.
“Përshëndetje profesor. Jam dakord me pikat e parashtruara për të mirën e futbollit apo edhe sportet e tjera në Shqipëri. Doja të shtoja te pika 2 edhe diçka tjetër. Të bëhet veting jo vetëm për federatat, por edhe për presidentët e skuadrave. Kjo për mospagesat e lojtarëve në kohë (ose asnjë pagesë), transparencë në financat e tyre apo edhe pagat e prapambetura të punonjësve të administratës.
Si është e mundur që Prokuroria apo edhe Përmbaruesit nuk kanë mundësi që të marrin paratë për të paguar punonjësit apo lojtarët? Me çfarë i paguajnë lojtarët këta presidentë? Si një ish-drejtor i një klubi me emër dhe me 9 muaj mospagesë të pagës, mund te them se futbolli shqiptar është në themel i korruptuar. E mbi të gjitha, ka një mospranim të ideve perëndimore për sportin në tërësi për të rritur të ardhurat për klubet. Respekt si gjithmonë. Faleminderit”, mbyllte komentin e tij Gerti Dajçi.
Tirana aktualisht duhet të paguajë 35 milionë lekë të vjetër për Gjergji Muzakën dhe 5 milionë lekë për Rei Qilimin.
Po kështu, klubi ka shumë borxhe te Tatimet apo palët e treta, të cilët kanë bllokuar llogaritë e klubit bardheblu dhe Dajçi është njëri nga shumë kreditorët e ekipit. Sigurisht, nëse ka kontratë të rregullt.
