Drejtori i Aviacionit Civil, Krislen Keri ka dhënë dorëheqjen.
Në vendin e tij Ministria e Infrastrukturës dhe Energjitikës ka vendosur Edlira Liçin.
Pas grabtijes së bujshme në Rinas në prillin e vitit të shkuar, shkarkimi i tij u bë fakt i kryer në media, por një gjë e tillë nuk ndodhi kurrë.
Emri i Krislen Kerit është lakuar për mosveprime dhe veprime të shumta abuzive, për të cilat “Gazetareforma.com” ka kryer disa hulumtime.
Një nga skandalet me të cilat lidhet emri i Kerit është falimentimi i “Fly Ernest”.
Aeroporti “Nënë Tereza” ka dërguar letra të shumta në adresë të Autoritetit të Aviacionit Civil, por edhe Ministrisë së Energjisë dhe Infrastrukturës që e ka nën varësi këtë institucion, por asnjë nga këto institucione nuk lëvizi gishtin, për të parandaluar dëmin ekonomik që shkaktoi falimentimi i “Fly Ernest”. Lexo këtu
Gjithashtu gjatë janarit të këtij viti, KLSH zbuloi 39 shkelje me vlerë 5 milion euro të kryera nga AAC me në krye Krislen Kerin, duke kërkuar shkarkimin e tij dhe ndjekjen penale. Lexo këtu
Gazetareforma.com ka kontaktuar Ministrinë e Infrastrukturës në lidhje me këto shkelje por ka marrë mbrapsh vetëm heshtje.
Emri i Krislen Kerit është lakuar po ashtu edhe në aksidentin tragjik të majit të vitit 2016, ku humbën jetën dy fëmijë, 3 dhe 5 vjeç.
Shkak për aksidentin u bë një barrierë mbrojtëse e ndërprerë në rrugën dytësore Golem-Kavajë, që i shërbente karburantit në pronësi të babait të Krislen Kerit, Pilo Keri.
Emri i tij asokohe u përmend disa herë në media, e megjithatë asnjë masë apo hetim nuk u ndërmor për zyrtarin e Ministrisë së Transporteve, i cili vetëm një vit më vonë do të vihej në krye të Autoritetit të Aviacionit Civil.
