Dhuna në familje dhe vrasja e grave po shndërrohet në një nga problematikat më të rënda të shoqërisë sonë.
Dy rastet e fundit(kujto: vrasja në Rrëshen dhe vrasja në Durrës) kanë ngjallur diskutime të shumta, teksa shumë shpejt pritet të ketë ndryshime edhe në ligj.
Mbrëmjen e sotme në emisionin “Open” është folur më gjerë rreth kësaj problematike, ku pjesë e panelit ishte edhe ish-deputetja Grida Duma.
Duma është e njohur për fjalimet e shpeshta që mban në mbrojtje të grave, teksa sot ka treguar disa raste aspak të këndshme që ka ndeshur në jetën e përditshme në lidhje me gratë e dhunuara.
Sipas saj, gjendja në të cilën ndodhet sot vendi ynë është alarmante, pasi renditemi si vendi i parë në Europë për numrin e vrasjeve të grave nga partnerët e tyre.
“Jemi në një situatë alarmante. 47% e grave vriten nga partneri, duke bërë të jemi vendi i parë në Europë për numrin e vrasjeve të grave nga partnerët e tyre.
Duhet të punojmë tani që rezultatet të shikohen pas 30 viteve. Një ndër metodat e zgjidhjes së këtij problemi është ndëshkimi. Sepse kur je mbrapa me çdo institucion kjo mund të jetë metodë”, u shpreh Duma.
Më tej, anëtarja e Kryesisë së Partisë Demokratike u shpreh se ka pasur nga ato raste që gratë janë bërë të forta dhe i kanë denoncuar burrat e tyre, por që kanë hasur rezistencë nga efektivët.
“Ka pasur raste që shumë gra kanë shkuar dhe kanë bërë denoncime. Dhe më pas janë përballur me efektivët që u kanë thënë grave ‘ec m’u zhduk, mos të të shikoj më këtu’. Dhe këtë nuk e them për të treguar mungesë respekti por për faktin se ata fillimisht janë burra dhe veprojnë si të tillë. Nuk e pranojnë dot që një burrë denoncohet,”- tha Duma.
